Солонгосын криминологийн хүрээлэнгээс явуулсан судалгаанд хамгийн их хэрэг, зөрчил гаргадаг үндэстнүүдийн жагсаалтыг монголчууд тэргүүлжээ. Монголын дараагаар Америк, Канад, Орос үндэстнүүд Солонгос улсад хамгийн их хэрэг, төвөг гаргадаг болох нь тогтоогджээ. Эдгээр улсуудын ард иргэдийн үйлдэж байгаа гэмт хэргийн тоо Солонгосчуудынхаас ч өндөр үзүүлэлттэй гарчээ.

Нэг жилд 100 мянган монгол хүнээс 7,064 нь гэмт хэрэгт холбогдсон гэсэн үзүүлэлтээр хамгийн өндөрт тооцогдсон. Харин нэг жилд 100 мянган хүн тутамд АНУ-ын 6,755 иргэн, Канадын 4,124 иргэн, ОХУ-ын 3,785 иргэн гэмт хэрэгт холбогдож байгаа гэнэ. Солонгос улсад 100 мянган хүн тутмын 3,692 нь гэмт хэрэг холбогддог гэсэн судалгаа байдаг бөгөөд энэ нь тус улсад байгаа гадаад иргэд илүү гэмт хэрэгт холбогддог болохыг харуулж байна.

    Өмнөд Солонгост 30 гаруй мянган Монгол иргэн байгаагийн 1800 буюу 6 хувь нь гэмт хэрэгт холбогдсон гэсэн мэдээллийг өнгөрсөн онд гаргажээ.Европчууд халдлага, дээрмийн хэрэгт холбогддог бол Монголчууд залилан, хулгайн хэрэг үйлддэг ажээ. Гэтэл Солонгосчууд хулгайн гэмт хэргийг хамгийн аюултайд тооцдог байна. Манайхан хаа явсан газраа хулгай хийж, гадаадынхныг хашраасан гэх. Урд хөршийн нэгэн дэлгүүрт монгол хүн, нохой хоёрт үйлчлэхгүй гэсэн бичиг хадаастай байжээ. Энэ нь монголчуудыг дорд үзэж байгаа хэрэг. Ер нь, манайхан хулгай хийхдээ янз бүрийн арга хэрэглэж, тэгэхдээ ихэвчлэн жижиг хулгай хийдэг гэнэ. Дэлгүүр, супермаркетад орохдоо хөхөвчиндөө бараа нуугаад гарах зэргээр хулгай хийсээр байгаад монголчуудад таагүй ханддаг болгоход нөлөөлсөн гэдгийг гадаадад суугаа цөөнгүй хүн ярьж байсан юм.

Баримт дурдвал, өнгөрсөн оны сүүлээр тус улсад жуулчны визээр нэвтрэн орж ирж байхдаа хулгай хийсэн монгол ээж, охин хоёрыг саатуулж байсан. Тэд нийт 9 сая воны үнэ хүрэх гар утас хулгайлжээ. Мөн манай улсын иргэн Янгжү дүүрэг дэх гадаа гудамжинд байрлуулсан автомашинуудын цонхыг хагалан дотор нь байсан барилгын голдуу зориулалттай 10 сая орчим воноор үнэлэгдэх багаж хэрэгсэлүүдийг нийтдээ 7 удаагийн үйлдлээр хулгайлсан хэрэг үйлдсэн байна. Үүнээс гадна тус улсад жуулчны визтэй ирээд эхнэр, нөхөр хоёр метроны буудал дотроос хувцас, гутал, бараа зэргийг хулгайлж байсан. Тодруулбал, нөхөр нь нууц камерыг халхалж, эхнэр нь тусгайлан доторлосон цүнхэндээ хийж байхыг Солонгосын телевизүүдээр цацаж, жинхэнэ онигоо болсон гэдэг. Энэ мэтчлэн дурдвал хэрэг бүрийг тоочоод барахгүй. Дээрх судалгаа, тоо баримтаас үзвэл, монголчууд маань хүний нутагт нэрээ бодох цаг болсон нь тодорхой байна.