Монгол Улсын Дээд шүүхийн Иргэний хэргийн танхим 2013 оны 11 дугаар сарын 1-ний өдрийн байдлаар нийт 859 иргэний хэрэг хүлээн авснаас Ерөнхий шүүгчид гомдол гаргасан 119, хяналтын журмаар гомдол гаргасан 696, шинээр илэрсэн нөхцөл байдлын улмаас хянуулах 35, харьяалал тогтоолгох 9 хэрэг байна.

Хяналтын журмаар гомдол гаргасан 696, шинээр илэрсэн нөхцөл байдлын улмаас хянуулах 35, нийт 731 хэргээс 24 хэргийг хэлэлцэхээс татгалзаж, 671 хэргийг шүүх хуралдаанаар хэлэлцэж, үлдэгдэл хэрэг 36 байна.

Шүүх хуралдаанаар хэлэлцсэн 671 хэргээс 640 хэргийг хяналтын шатны журмаар, 31 хэргийг шинээр илэрсэн нөхцөл байдлын улмаас хянажээ.

Хяналтын шатны шүүх хуралдаанаар хянан шийдвэрлэсэн 640 хэргийн 60 хувь буюу 384 хэргийн шийдвэр, магадлал хэвээр үлдэж, 21 хувь буюу 134 хэргийн шийдвэр, магадлалд өөрчлөлт оруулж, 17.8 хувь буюу 114 хүчингүй болж, дахин хэлэлцүүлэхээр буцааж, 1.2 хувь буюу 8 хэргийн шийдвэр, магадлалыг хүчингүй болгож, нэхэмжлэлийг  хэрэгсэхгүй болгосон байна.

Шүүх хуралдаанаар хэлэлцсэн 671 хэргийн 68 хувь буюу 456 нь Нийслэлийн, 32 хувь буюу 215 нь орон нутгийн шүүхийн шийдвэр, магадлалтай хэрэг байна.

Орон нутгийн шүүхээс ирсэн хэргийг авч үзвэл Дархан-Уул аймгийн шүүхийн 46, Орхон аймгийн шүүхийн 29, Баян-Өлгий аймгийн шүүхийн 22, Сэлэнгэ аймгийн шүүхийн 17, Дорнод аймгийн шүүхийн 15, Говь-Алтай аймгийн шүүхийн 11, Хөвсгөл, Увс аймгийн шүүхийн тус бүр 10, Төв аймгийн шүүхийн 8, Дорноговь, Өвөрхангай, Ховд аймгийн шүүхийн тус бүр 6, Сүхбаатар аймгийн шүүхийн 5, Баянхонгор, Булган, Өмнөговь аймгийн шүүхийн тус бүр 4, Говьсүмбэр, Дундговь, Завхан аймгийн шүүхийн тус бүр 3, Архангай аймгийн шүүхийн 2, Хэнтий аймгийн шүүхийн 1 хэрэг хянагджээ.

Тус танхим 2013 оны 10 дугаар сарын 31-ний өдрийн байдлаар нийт 127 албан бичиг, өргөдөл, гомдол хүлээн авч 125 шийдвэрлэж, хяналтын шатны шүүх хуралдаан болон шийдвэрлэсэн хэргийн тоймыг тогтмол мэдээлж ирсэн байна.