Сүүлийн үед барилгын ослоос болж олон хүн алтан амиа алдах боллоо. Хөдөлмөр аюулгүй байдлаа бүрэн хангаж ажлаагүйгээс болж иймэрхүү хэргүүд өдөр алгасахгүй гарах болсоныг цагдаагийн байгууллагаас сэрэмжлүүлж байна. Өнгөрсөн сард БЗД-ийн 12-р хороонд ”Батширээт” ХХК-ний баригдаж байгаа барилга дээр Хэнтий аймгийн Батширээт сумын харьяат иргэн 25 настай эрэгтэй А, мөн сумын харьяат иргэн 23 настай эрэгтэй О нар угсардаг төмөр шат зөөж байгаад өндөр хүчдэлийн шугаманд хүрч тогонд цохиулж нас барсан хэргийг бид мэдээлж байсан. Хэргийг одоогоор БЗД-ийн цагдаагийн нэгдүгээр хэлтэс шалгаж байгаа юм. Мөн хэргийн мөрөөр манай сурвалжлах баг тус барилга дээр очиж байсан. Тухайн үед барилгын үйл ажиллагааг зогсоосон байсан бөгөөд хэдэн хоногийн өмнөөс үйл ажиллагаагаа буцаагаад эхлүүлжээ. Хоёр хүний аминд хүрсэн барилгын ажил ямартаа ч үргэлжлэн явагдаж байна. Харин хүний аминд хүрсэн буруутан болж үлдэж байгаа этгээд хэн болохыг удахгүй нэхэн сурвалжлан хүргэх болно.