Улсын мөрдөн байцаах газар, Эрүүгийн цагдаагийн газар, Хилийн тагнуулын алба, Гаалийн Ерөнхий газар хамтран хяналт шалгалт явуулж, энэ сарын 30-ны өдөр Дорноговь аймгийн Замын-Үүд дэх авто замын шалган нэвтрүүлэх боомтоор хар тамхи оруулахаар завдсан Монгол Улсын иргэн Б-г илрүүлэн шалгаж байгаа талаар манай сайт мэдээлсэн. Тодруулбал, Гаалийн Ерөнхий газрын ажилтны хүү Б гэгч нь “Marlboro” тамхины хайрцагт 0.917 грамм “ICE” буюу мөс гэх бодис оруулахыг завдсан юм. Албаны эх сурвалжийн мэдээлж буйгаар, тэрээр хар тамхи зарж, борлуулж, зөөвөрлөдөг байсан гэх. Мөн хил дамнуулан мансууруулах бодис худалдаалдаг томоохон сүлжээ бүхий бүлэглэлтэй холбоотой байж болзошгүй гэв. Тэрээр өөрөө ч мөрдөн байцаалтын явцад БНХАУ-ын Эрээн хотоос уг хар тамхийг тосон авч, Замын-Үүд дэх авто замын шалган нэвтрүүлэх боомтоор нэвтрүүлэн Улаанбаатар хот руу хүргэх үүрэгтэй тээвэрлэгч хэмээн мэдүүлсэн байна. Тиймээс түүний мэдүүлгийн дагуу хэнээс авсан, Улаанбаатар хотод хэнд өгөх гэж байсан зэргийг тодруулахаар ажиллаж байгаа юм байна.Ямартаа ч энэ талаар ЦЕГ-ын хэвлэл мэдээллийн ажилтан Ё.Лхагвасүрэнгээс зарим зүйлийг тодрууллаа.

-“Marlboro” тамхины хайрцагт мансууруулах бодис оруулахыг завдсан хэрэг гараад байгаа гэсэн. Энэ талаар мэдээлэл өгөөч?
-Замын-Үүд сумаар бодис тээвэрлэж оруулж ирсэн хэрэг гарсан. Үүнийг Замын-Үүд сумын цагдаагийн хэлтсийн алба хаагчид, Хил хамгаалах ерөнхий газрын алба хаагчид мөн Гаалийн ерөнхий газар хийгээд бусад мэргэжлийн хяналтынхан хамтран илрүүлэн шалгаж байгаа. Уг асуудал дээр Б гэгчийг холбогдуулан шалгаж байгаа.

-Түүнд эрүүгийн хуулийн ямар зүйл заалтаар эрүүгийн хэрэг үүсгэсэн бэ?
-Хэргийг харьяаллын дагуу УМБГ-ын Зохион байгуулалттай гэмт хэрэгтэй тэмцэх хэлтэст шилжүүлэн шалгаж эхэлсэн. Түүнд Эрүүгийн хуулийн тусгай ангийн 188.2-т зааснаар хэрэг үүсгэн шалгаж эхэлсэн байгаа. Тус зүйл ангид хар тамхи, мансууруулах буюу хордуулах, цацраг идэвхт, тэсэрч дэлбэрэх бодисыг хууль бусаар Монгол Улсын хил нэвтрүүлсэн бол таваас дээш арван жил хүртэл хугацаагаар хорих ял шийтгэнэ.