Сүүлийн үед Монголын залуучуудын холбоо гэж улс төржиж шоудсан байгууллага бий болов. Өнгөрсөн хугацаанд залуучуудын төлөө хийсэн ажил нь их үү? шоудсан ажил нь их үү? гэвэл захын залуу нэг л дүгнэлтийг хэлнэ. Хүмүүс энэ байгууллагыг тэргүүний залуучуудыг шагнаж урамшуулдаг гэж ойлгодог. Харин “Тэргүүний залуу” медаль авсан хүмүүсийг сүүлийн үед хэдэн төгрөгөөр авсан бэ? гэж асуудаг болов. Учир нь МЗХ өөрийн нэр дээрх хэдэн тэмдэгийг мөнгөөр үнэлж зардаг болоод удлаа.
Тэргүүний хийгээд манлайлагч гэсэн ямар ч шалгуур тэдэнд сонин биш. Мөнгөө өгье медалийг чинь аваад хэдэн залуустаа тараая гэсэн болгонд дуртай өгдөг тогтолцоо бий болов.
Хамгийн сүүлд УИХ-ын гишүүн М.Зоригт энэ байгууллагын нэг булхайг олон нийтэд ил болгов. Эх сурвалжийн мэдээлснээр эрхэм гишүүн орон нутгийн хоёр залууг шагнуулах хүсэлт гаргатал түүнийхээ хариуд тун дажгүй нэхэмлэх хүлээн авчээ. Шуудхан шагнуулах залуучуудынхаа медалийн мөнгийг өг гэж шударгаар нэхжээ. Гэвч эрхэм гишүүний гэдэнг нэг зүйл хөдөлгөжээ. Учир нь медалийн хураамжнаас МЗХ НӨАТ-ийн мөнгө нэмж нэхжээ. Үүнд нь дургүйцсэн М.Зоригт гишүүн “МЗХ-г НӨАТ төлдөг гэдэгт огт итгэхгүй” гэдэгээ олон нийтэд мэдээлэв. Тэгээд харьялалынх нь татварын байгууллагад хандан МЗХ НӨАТ төлдөг эсэх талаар лавлагаа авахаар шийдсэн байна. Ингээд НӨАТ төлдөггүй нь илэрвэл бусад байгууллага, аж ахуйн нэгжүүдээс НӨАТ-ийн мөнгө гэж хурааж авч байсан мөнгөө юунд зарцуулсан бэ? гэдэг асуудал үүсэх нь. Ер нь төрийн бус байгууллагууд НӨАТ төлж байсан тохиолдол ховор байх л даа. Ямар ч байсан хамгийн түрүүнд МЗХ шалгагдах нь тодорхой боллоо. Энэ мэтээр шагнал зарж амь зуухаас эхлээд баяжих хүртлээ хөлжсөн байгууллагуудыг татварынхан шалгаж нягталж байх цаг ч ирлээ.
Ямар ч байсан МЗХ-ны “Тэргүүний залуу” гэх мэт элдэв шагналыг мөнгөөр худалдаж авч болдогийг тус байгууллагын нэхэмжлэх нотолж өглөө.
Сэтгэгдэл (6)