Дэлхийн агаарын тээвэрлэгчдийн холбоо /ИАТА/ болон олон улсын иргэний нисэхийн байгууллагуудаар дамжуулан НҮБ-ын шинжээчид өнгөрсөн хоёрдугаар сард Монгол болон бусад улсын авиа компаниудад шалгалт хийсэн байна. Уг шалгалтад манай агаарын тээвэрлэгч компани болох “Хүннү Эйрлайнс” тэнцэлгүй хар жагсаалтад оржээ.

 Тодруулбал, авиа компаниудын эрсдлийн үнэлгээг тогтоох зорилготой тус шалгалтаар онгоцны үзлэг, оношлогоо, үйлчилгээнээс эхлүүлээд зорчигчдодоо ямар хоол өгч буйг хүртэл шалгадаг байна. Ингэхдээ үйл ажиллагаанд үнэлгээ тавьж А, В, C, D гэсэн зэрэглэл тогтоож үнэлгээ өгдөг аж. А, B дүн авсан бол асуудлгүй. Харин С үнэлгээ авбал тодорхой хэмжээний зөвшөөрөл авдаг байна.  Харин D үнэлгээ авбал тус компаниас шууд татгалзаж, хар дансанд бүртгэдэг аж. Цаашилбал НҮБ-аас тус компаниар үйлчлүүлэхгүй байхыг олон нийтэд анхааруулдаг байна. Уг шалгалтад “Аэрфлот”, “Эйр Чайна”, “Кореан Эйр”, “Туркиш Айрлайнс” А  үнэлгээ авсан байна. Харин төрийн өмчийн “МИАТ” компани, “Изинис Эйрвэйс” B, “Аэро Монголиа” С үнэлгээ авчээ.

Дашрамд дурдахад "Хүннү Эйрлайнс" нь өмнө “Монголиан Эйрлайнс” нэртэйгээ үйл ажиллагаагаа явуулж байгаад саяхнаас нэрээ сольсон билээ. НҮБ-аас тус компаниар үйлчлүүлэхгүй байхыг аль хэдийн сануулж эхэлсэн байна.