Өнгөрсөн хоногийн хугацаанд Нийслэлийн Онцгой байдлын газарт объектын гал түймрийн 5, зөрчлийн 5, аврах ажиллагааны 1 дуудлага ирж нийслэлийн Аврах анги, харъяа дүүргийн Онцгой байдлын хэлтсийн Аврах, гал унтраах ангийн бүрэлдэхүүн шуурхай арга хэмжээ авч ажилласан байна. Тухайлбал, Чингэлтэй дүүргийн 7 дугаар хороо, Хувьсгалчдын Г-ийн 10 дугаар гудамжинд байшин шатаж байна гэсэн дуудлагыг 13:53 цагт өгснөөр Аврах, гал унтраах 10 дугаар ангийн 1 дүгээр тасгийг гаргахад 7х8 метрийн хэмжээтэй байшингийн дээврийн хэсэг яндангийн цонолтоос шатаж байсныг шуурхай ажиллаж унтраасан байна. Мөн Баянзүрх дүүргийн 5 дугаар хороо, Монелийн 11 дүгээр гудамжинд  байшин шатаж байна гэсэн дуудлагаар Аврах, гал унтраах 63 дугаар ангийн тасгийг гаргахад 4х6 метрийн хэмжээтэй байшингийн дотор тал, дээврийн хэсэг шатаж байсныг унтрааж, 4 сая төгрөгийн өмч хөрөнгийг гал түймрийн аюулаас авран хамгаалсан байна. Түүнчлэн, Баянгол дүүргийн 20 дугаар хороо, ДЦС-4 ТӨХК-ийн урд  контейнер шатаж байна гэсэн дуудлагын дагуу Аврах, гал унтраах 18 дугаар ангийн тасгийг гаргахад 40 тоннын чингэлэгт барилгын материал шатаж байсныг унтраажээ.