Ерөнхийлөгч Ц.Элбэгдоржийн санаачилсан Монгол Улсын Засгийн газрын тухай хуульд өөрчлөлт оруулах тухай хуулийг хэлэлцэх эсэхийг УИХ-ын чуулганаар 86,8 хувийн саналаар дэмжлээ. МАН-ын бүлгийн гишүүд сайд нарын "давхар дээл"-ийг тайлах хуулийн төслийг 2016 оноос хэрэгжүүлж эхэлнэ гэснийг шүүмжилж, 2014 оноос эхлэх хэрэгтэй гэсэн байр суурьтай байна. Харин Ерөнхийлөгчийн зүгээс уг хуулийн хэрэгжих хугацааг өөрчилбөл хориг тавина гэдгээ мэдэгдээд байгаа юм. Учир нь энэ Засгийн газрын тогтвортой байдалд нөлөөлнө гэж үзэж байна.

  Ё.Отгонбаяр: Энэ хуулийн төслийн зарчим нь зөв ч логик нь буруу байна. 2016 он хүртэл буруу явъя гэж болохгүй. Буруу гэж үзэж байгаа нь үнэн юм бол тэрийгээ засах хэрэгтэй. Гүйцэтгэх засаглалын тогтвортой байдалд сөргөөр нөлөөлнө гээд байгаа юм бол 2016 он дуусахаар тогтворгүй болох юм уу?

Д.Арвин: Ямар ч улс төрч, ямар ч нам өмнө нь ингэж санаачилж байгаагүй. Ерөнхийлөгч анх удаа санаачилсныг дэмжиж байна. Заавал батлагдсан өдрөөс хэрэгжүүлнэ гэж зүтгэж болохгүй. Улс төрчид сонгуулийн дараагаар сайд болох гэж дарга нараа тойрч гүйдэг. Би хэзээ ч сайд болъё гэж гүйдэггүй байсан. Анх удаа ийм хууль санаачилсан байхад заавал хугацааг нь наашлуул гээд хошуурч болохгүй. Засаг, тогтолцоогоо аваад явъя гэвэл дэмжих хэрэгтэй. Та нар бүгдээрээ 2016 онд бид ялчихвал яах бол оо? гэж бодож байгаа. Аягүй бол 2016 онд энэ хуулийг өөрчилнө гээд оруулж ирж ч магад.

А.Бакей:  Ерөнхий сайд өнөөдөр хүчгүй байна. Зөвхөн энэ хуульд өөрчлөлт оруулснаар асуудал шийдэгдэхгүй. Тиймээс иж бүрэн байдлаар шийдэх хэрэгтэй.

Д.Дэмбэрэл: Ерөнхий сайд бол нэг номерийн хариуцлага хүлээх ёстой хүн. Өнөөдөр Ерөнхий сайд бүрэн хариуцлага хүлээх эрх зүйн орчин бүрдсэн гэж хэлж болохгүй. Хугацааг наашлуулна гэхээр хориг тавина гэж байна. Ерөнхийлөгчийн хоригоор айлгаж болохгүй. Хориг бол айлгах биш бодлогын механизм.

Ц.Оюунбаатар: 2016 оноос хэрэгжүүлнэ гэвэл төрийн хохирлыг гурван жил үргэлжилж л байг гэсэн үгтэй адил.

М.Батчимэг: Улс төр, төрийн алба хоёрыг зааглах ёстой. Улс төр, бизнес хоёрыг зааглаж байж урагшаа явна. Үүний эхлэл нь УИХ, ЗГ тусдаа байх явдал. Засгийн газрын сайд нарын гуравны нэг нь УИХ-ын гишүүн байх ёстой гэсэн саналыг дэмжиж байна. Ухаалаг төртэй болъё гэвэл энэ хуулийг дэмжих хэрэгтэй. Харин Засгийн газрыг унагаах гэж дэмжиж байвал буруу. Үндсэн чиг үүргийн яамдын сайд нар УИХ-ын танхимд үлдэх боломжтой гэж үзэж байна. Хугацааны хувьд ярьж байж шийдэх хэрэгтэй. 

     Уг хуулийн төслийн хэлэлцэх эсэхийг ийнхүү дэмжсэнээр холбогдох байнгын хороонд шилжүүлж, УИХ-ын чуулган завсарлалаа.