Улс орны эдийн засгийн өсөлт сайн байхын хэрээр шинэ бүтээн байгуулалт бий болдог шүү дээ. Тэгвэл ирэх 2014 онд манай улсын эдийн засаг сайн байх нь хэмээн иргэд магтаалын үг унагаж эхэллээ. Учир нь ирэх онд эхлэх томоохон бүтээн байгуулалтууд цөөнгүйг байгааг тэд хэлж байгаа юм. "Амны билгээр ашдын билэг" гэгчээр 2014 онд төлөвлөгдсөн бүх бүтээн байгуулалтууд яг цаг тухайдаа хийгдэж,  манай улсын хөрөнгө оруулалт, ашиг орлого нэмэгдэх биз ээ. Ингээд ирэх онд хийгдэж эхлэх бүтээн байгуулалтаас цөөхөн хэдийг нь цухас дурдъя.

Концессийн хуулийн хүрээнд ДЦС-V төслийн бүтээн байгуулалтын ажил өрнөнө. Энэ жил тус төслийг гүйцэтгэх консорцум шалгарч, байршлын судалгааг хийж байгаа билээ. Улмаар ДЦС-V байршлыг Хөлийн голын хөндийд барихаар тогтсон байгаа. Тус байршил нь байгаль орчны ерөнхий судалгаагаар цэвдэгтэй гэж гарсан. Гэхдээ дахин байршлыг солихгүй  гэдгийг гүйцэтгэгч газрууд хийгээд салбарын яамны зүгээс мэдэгдсэн. Ийн 43 га талбайд баригдах ДЦС-V баригдчихвал маш том бүтээн байгуулалт болох юм.

Манай улс "Төрөөс төмөр замын тээврийн талаар баримтлах бодлого"-д тусгасны дагуу эхний ээлжид 1800 км төмөр зам барих ажлыг эхлүүлсэн. Энэ жил "Ухаахудаг-Гашуунсухайт" чиглэлийн 260 гаруй км төмөр замын далан буюу газар шорооны ажлын 66 хувийг хийж гүйцэтгэсэн бөгөөд ирэх онд дэд бүтцийн ажлаа хийх юм. Өөрөөр хэлбэл, зам төмөр, бетон дэр тавих зэрэг ажлыг хийхээр төлөвлөсөн байгаа.

Ирэх онд 16 аймгийн 16 сумын айл өрх, албан байгууллагыг цэвэр, бохир, ус дулаанд холбох цэвэрлэх байгууламж байгуулж орчин үеийн жишиг сум болгох томоохон төслийг гүйцэтгэх төлөвлөгөөтэй байгаа. Энэ төсөлд төсвөөс 80 тэрбум төгрөг хуваарилсан бөгөөд нэг суманд таван тэрбум төгрөг зарцуулах юм. Энд Баянхонгор, Говьсүмбэр, Дархан-Уул, Орхон аймаг багтаагүй. Харин үлдсэн 16 аймаг бүрээс тус бүр нэг сум  сонгох ажээ. Ингэхдээ дээрх аймгуудаас сонгогдсон их хурлын гишүүд жишиг болгох сумаа сонгож байгаа юм.

2013 он гарсаны дараахан УИХ Дархан-Уул аймагт жилд хоёр сая тонн газрын тос боловсруулах үйлдвэр барих тогтоол гаргасан. Энэ жил газрын тосны үйлдвэрийн техник эдийн засгийн үндэслэлийг бүрэн хийж дууссан байна. 2014 онд барилгын ажил эхэлж 2015 онд ашиглалтанд оруулах төлөвлөгөөтэй ажиллаж байгааг ажлын хэсгийнхэн онцлов.

2016 он гэхэд бүх аймгийг нийслэл Улаанбаатартай хатуу хучилттай замаар холбож дуусна. Энэ жил Баянхонгор, Дорноговь, Дундговь аймгийг холбосон бол ирэх жил Дорнод, Хөвсгөл, Өмнөговь аймгийг Улаанбаатар хоттой хатуу хучилттай автозамаар холбох юм. Эдгээр гурван аймгийг нийслэлтэй холбох хөрөнгийг төсвөөс санхүүжүүлэхгүй. Харин "Чингис" бондын мөнгөөр санхүүжүүлэхээр төлөвлөсөн байгаа аж. Дорнод, Хөвсгөл, Өмнөговь аймгийн замын ажил энэ жил эхэлсэн ч зарим хэсгийн гүйцэтгэгч компанийн маргаантай асуудлаас болж ажил зогссон байгаа аж. Тиймээс  ирэх хавар дээрх гурван аймгийг нийслэлтэй холбох ажил эхэлнэ.

Манайд усан цахилгаан станцтай болох талаар удаан ярьсаны эцэст энэ оны арваннэгдүгээр сард Засгийн газрын хуралдаанаар Эгийн голын усан цахилгаан станц барих төслийн нэгж байгуулж, санхүүжилтийн эх үүсвэрийг баталсан билээ. Тодруулбал, Азийн хөгжлийн банкны экспертүүд манай улсад 1991 оноос эхлэн тус усан цахилгаан станцыг барих ажлн ТЭЗҮ-ийг батлах нарийвчилсан зураг төсөл боловсруулахад хөнгөлөлттэй зээл олгохоор болсон. Тус усан цахилгаан станцыг барьснаар жилдээ  10 сая ам.долларыг хэмнэх ба хөрөнгө оруулалтаа  10-15 жилд нөхөх юм.  Түүнчлэн 220 мВт хүчин чадалтай тус усан цахилгаан станц нь төвийн бүсийн эрчим хүчний томоохон эх үүсвэр болно гэдгээрээ онцлог ажээ. Санхүүжилтийн хувьд эхний ээлжинд Тавантолгойн нүүрсний орд газрыг түшиглэн барих 450 мВт хүчин чадалтай цахилгаан станцын төсөлд зарцуулахаар шийдвэрлэсэн 50 сая ам.долларын эх үүсвэрээс ашиглаж байгаа бол цаашид, дотоод гадаадын томоохон хөрөнгө оруулагчдыг татахаар болжээ.

Ирэх жил боловсролын салбарт 61 тэрбум 96 сая төгрөгийн шинэ бүтээн байгуулалтын ажил өрнөнө. Үүнээс онцолбол, улсын хэмжээнд нийт 21 цэцэрлэгийн барилгын ажил эхэлж ирэх ондоо багтаж ашиглалтанд орно. Мөн улсын хэмжээнд долоон сургууль барих юм.  Үүнээс гурвыг нь Улаанбаатарт, үлдсэнийг нь хөдөө орон нутагт барих юм байна.