МАХН-ыг татан буулгах ёстой хэмээн “Бүх ард түмний хуралдай” ТББ болон намын гишүүд дэмжигчдийн холбооноос шаардаж байгаагаа мэдэгдлээ. Тэд МАХН нь намуудын тухай хуулийг ноцтой зөрчсөн бөгөөд “Ард түмний эв нэгдлийг бусниулсан” хэмээн үзэж байгаа аж. Тиймээс энэхүү саналаа Улсын дээд шүүхэд хүргүүлж, яаралтай шийдэж өгөхийг хүсчээ.

Юутай ч их хуралд чамгүй олон суудалтай намын хувьд дотоод асуудал нь нэлээд ярвигтай байгаа бололтой. Энэ нь МАХН-д гомдсон хүмүүсийн эгнээг улам өргөжсөөр байгааг илтгэх биз ээ. Магадгүй энэ бүх шуугианыг намжааж намын дарга Н.Энхбаяр хариулт өгөх хэрэгтэй байх.

Ингээд  МАХН-ын Гишүүдийн Дэмжигчдийн холбооны тэргүүн Г.Баярсайханаас зарим зүйлийг тодрууллаа.

-Ямар шалтгаанаас болоод намаа татан буулгах болсон юм бэ?

-Хууль зөрчсөн, "Оюу толгойн" гэрээний асуудал дээр зөв шийдвэр гаргуулж чадсангүй. Мөн Сэлэнгэ аймагт хүүхдийнхээ хамт голд урсаж явсан ээжийг хайж олох тал дээр асуудалтай хандсан. Тухайн үед Онцгой байдлыг хариуцаж байсан Шадар сайд Д. Тэрбишдагва ажлаа муу хийсэн гээд яриад байвал олон зүйл байна.

-Танай холбооны гишүүд дэмжигчид хэд байдаг вэ? Танайхаас намын бага хуралд төлөөлөл бий юу?

-Одоогийн байдлаар 20 гишүүнтэй. Бүгд намын бага хуралд оролцох эрхтэй гишүүд.

-Намынхаа удирдлага болон намын дарга нарт намаа татан буулгах гэж буйгаа мэдэгдсэн үү?

-Удаа дараа албан ёсоор татан буулгах тухай мэдэгдэл хүргүүлсэн. Улс төрийн нам шиг нам байж, ажил үүргээ гүйцэтгэж чадахгүй байна. Энэ асуудлуудыг яаралтай шийд гэсэн асуудлыг тавьсан. Ямар ч хариу ирээгүй учраас өнөөдөр бид хэвлэлийнхэнд хандаж байгаа нь энэ.

                                                                                                                                                                                  24tsag.mn