-   Монголын үндэсний телевизэд өгсөн ярилцлагыг тань сонсоход уран зохиолын хичээлийг хасах юм шиг ойлгогдож байсан. Энэ талаар та ямар тайлбар хийх вэ? 

-   Өчигдөр оройны мэдээг бэлтгэсэн сэтгүүлч надтай уулзаад Монгол хэлний бодлогын талаар асуусан. Харин би энэ талаар тайлбар хийхдээ “Миний нутаг” шүлгээр жишээ авч ярьсан. Гэхдээ мэдээний цаг хязгаартай учраас миний яриаг тасалж оруулснаас болоод хүмүүст буруугаар ойлгогдохоор болсон байна лээ. Би ямар тайлбар хийсэн бэ гэхээр “Миний нутаг” шүлгийг монгол хэл, уран зохиолын хичээлээр үзлээ гэхэд энэ шүлгийнхээ агуулгыг математик, технологийн хичээл дээр яаж ашиглах вэ гэдэг талаар ярьсан. “Миний нутаг” шүлгийн агуулгаар нь математикийн хичээл дээрээ бодлого зохиож болж байна. Мөн зураг зурж болно. Экологийн хичээлээ судалж болно. Тиймээс монгол хэл уран зохиолын хичээл бол суралцахуйн суурь чадамж. Эх хэлнийхээ агуулгатай бусад хичээлээ холбоно гэсэн тайлбарыг уран зохиолын хичээлийг бусад хичээл рүү шингээгээд хасах гэж байгаа мэтээр ойлгосон байна. Цаашдаа ч энэ тал дээр анхаарч, уран зохиолын хичээлийн цагийг нэмэх бодлого баримтална. Үүнийхээ дагуу Монгол хэлний заах арга барил, арга зүй технологийн сайжруулахаар бэлтгэж байна. Эхний улиралд уран зохиолын хичээл дээр “Миний нутаг” шүлгийг үзэж байгаа бол бусад хичээл нь ч эх оронтойгоо холбоотой хичээлээр үргэлжлэх гэх мэтээр арга зүй технологио сайжруулна. Жишээ хэлье. "Миний нутаг" шүлгэнд "Хэнтий Хангай Саяны өндөр сайхан нуруунууд" гэсэн хэсэг гардаг. Тэгэхээр Хэнтий Хангай Саян гэж хаана байдгийг газар зүйн хичээлээрээ үзэх гэх мэт задлах  юм.

-    Одоо ЕБС-д монгол хэл уран зохиолын хичээлийг хэдэн цагаар үзэж байгаа вэ?

-   Ерөнхий боловсролын сургуульд заадаг монгол хэл, уран зохиолын хичээлийн цаг одоо 2202 орчим орж байгаа бол цаашдаа 145 цагаар нэмж 2374 болгоно. Засгийн газраас хийж байгаа зөв алхамыг ганц мэдээнээс болж буруугаар ойлгогдоосой гэж хүсэхгүй байна. Шинэчлэлийн Засгийн газраас Монгол хэл, уран зохиолын салбарт маш онцгой анхаарч байгаа. Монгол хэл, уран зохиолын хичээл дээр арга зүй технологио сайжруулах асуудлыг яамнаас чухалжилж байгаа. Хүүхдүүдэд дүрэм заагаад түүнийгээ шалгаад байх шиг биш эх хэлээрээ ярьж, өөрийгөө ойлгуулах чадвар, уншсанаа ярих чадварыг эзэмшүүлэх зэрэг асуудлыг ярьж байна. Энэ жилээс эхлээд Монгол хэлний шалгалтыг бүх их дээд сургуульд элсэгчдээс авахаар болж байгаа. Өмнө нь шалгалт авахдаа тестээр авдаг байсан. Үүнийг болиулж, эссе бичих, бүтээлч байдлыг хөгжүүлэх үүднээс задгай даалгавар оруулж ирж, 50 хувь тест, 50 хувь нь бичих байдлаар шалгалт боловсруулж байна. Хоёрдугаар сарын 25-ны өдөр гэхэд шалгалтын хэлбэрийг боловсруулаад материалаа танилцуулна.

-    Уран зохиол болон хэл бичгийн хичээлийг илүү судлуулах шаардлагатай гэж хэлж байна уу?

-    Монгол сэтгэлгээтэй монгол хүн болгон төлөвшүүлэхэд монгол хэл, уран зохиолын хичээл маш чухал. Өнөөдөр өргөдөл ч бичиж чаддагүй хүмүүс олон байна. Тиймээс эх хэлээрээ зөв, сайхан бичдэг болгохын тулд монгол хэл уран зохиолын хичээлийг түлхүү оруулна. ЕБС-ийн багш нарыг оролцуулахгүйгээр шийдвэрийг гаргалаа хэмээж байсан. Тийм зүйл огт байхгүй. Уран зохиолыг хасна гэсэн шийдвэр гараагүй учраас энэ асуудлаар юу гэж ярих билээ. Уран зохиолыг хасах бус харин ч эсрэгээрээ бусад хичээлийн суурь болгоно. Хүүхдүүдийн унших чадвар, бичих чадварыг илүү сайжруулахын төлөө ажиллана.