“Хууль зүйн үндэсний хүрээлэн”-д “Цагдаагийн албаны тухай хууль болон түүнийг дагаж мөрдөх журмын тухай” сэдэвт сэтгүүлчдэд зориулсан чөлөөт уулзалт болж өндөрлөсөн юм. Энэ үеэр Хууль зүйн яамны дэд сайд Э.Эрдэнэжамъяанаас уг хуультай холбоотой зарим зүйлийг тодрууллаа.

-Цагдаагийн албаны тухай өөрчлөлт оруулсан нь иргэдэд хэр хүрч байх шиг байна. Ялангуай цагдаагийн ажилчид өөрсдөө энэ хуулийг сайшаахгүй байгаа гэж сонссон?

-Орон нутгаар явахдаа олзтой гэмээр явлаа.  Урд нь хөдөө орон нутгаар явахад хүмүүс гомдол захиа их өгдөг байсан. Гэтэл сая явахад надад ирсэн захидлуудын ихэнх нь цагдаагийн байгууллагын үйл ажиллагаа сайжирсан тухай, тэр цагдааг урамшуулж өгөөч гэсэн байлаа. Мөн шүүхийн үйлчилгээ сайн болсон тухай магтаал их сонслоо. Хуулийн хэрэгжилтийг ард түмэн аятайхан хүлээн авч байна. Гэтэл энэ хуулийг ард түмэн сайн хүлээж авч байхад хуулийн байгууллагынхан өөрсдөө айдастай, болгоомжилсон байдалтайгаар хүлээж авах тохиолдлууд гарч байна. Манай хууль сахиулах их сургуульд ажиллаж байгаа хүмүүс хуулиа зөв хэрэгжүүлж байгаагийн илрэл юм болов уу хэмээн харж байна. Хуулиудын өөрчлөлт бол эхлэлийн хэмжээнд л байгаа шүү дээ.  Цаашид процессын өөрчлөлтүүдийг бүхэлд нь хийсний дараа бүр ч сайн үр дүн гарна гэдэгт итгэлтэй байна.

-Тэтгэвэрт гарахад өгдөг 36 сарын цалин нь байхгүй болно гэсэн яриа албаныхан дунд их байсан. Энэ талаар?

-Тийм зүйл огт байхгүй.  Тэтгэвэрт гарахад өгдөг 36 сарын цалин нь байхгүй болж 18 сар болох гэж байгаа гэж цагдаагын ахмад ажилтнууд ярьж байгааг би ч сонссон. Тэгвэл тэдгээр хүмүүст хандаж тийм асуудал огт байхгүй, урдынхаараа олгогдоно гэж хэлмээр байна. Мөн таван жил хөдөө орон нутагт ажилласан цагдаад олгодог урамшууллыг больсон юм уу гэх зүйл яригдсан.  Тэгвэл энэ нь болиогүй. Юутай ч хэн хэнээ гомдоохгүй байхыг бодно шүү дээ. Хууль нь батлагдчихсан, одоо засгийн газраас яаж олгох вэ гэсэн журам нь гарна.

-Цол тушаалаасаа эхлээд ойлгомжгүй зүйлс гарч байна гэсэн байх аа?

-Албан тушаалын цолны тухай ойлголт нь шинэ зүйл биш. Тав зургаахан жилийн өмнө хэрэглэж байсан армийн нэг хэрэглээ. Ямар албан тушаал дээр байгаагаас хамаараад ямар цолтой байх нь шийдэгдэнэ гэсэн үг. Өөрөөр хэлбэл, удаан жил ажилласан гэж цол нэмэгдэнэ гэсэн үг биш. Өмнө нь  тушаал өгч байгаа дарга нь хошууч цолтой байхад доод албан тушаалтан нь хурандаа цолтой байх жишээний байсан. Үүнээс болж хэн нь хэндээ ёслох вэ гэдгээс эхлээд зөрчил их үүсч байсан юм. Ер нь манайх шиг ийм тайван амгалан иргэний улсад албан дандаа л тушаалын цол хэрэглэдэг юм билээ. Гэхдээ үүнийг шийдэхдээ шилжилтийн зохицуулалтыг хэрэглэх юм. Урд нь армид цолыг нь хэвээр үлдээж байсайн байгаа. Тухайн хүн дөрөв таван жил ажилласны дараа уг асуудал нь дөрөв таван жилийн дараа л аяндаа шийдэгдчихдэг юм билээ. Яг үүнтэй адил шилжилтийн зохицуулалт хийнэ. Тэгэхээр  хүмүүсийн цолыг хураана гэсэн ойлголт байхгүй.Ямартаа ч дөрөв, таван жилийн дараа энэ асуудлыг хүмүүс аяндаа ойлгох байх.

-Тэгэхээр хууль хэрэгжиж байгаатай холбоотой цагдаагийн алба хаагчдыг мэргэшүүлж, дадлагажуулах ажил хийх хэрэгтэй гэж үзэж байна уу?

-Ер нь байнга л сургаж, чадваржуулах хэрэгтэй.

-Цалин мөнгөний хувьд өөрчлөгдөж байгаа зүйл байгаа юу?

-Сая нэгдүгээр сард баталсан тогтоол байгаа. Үүнд цол авч байгаа эсвэл цэргийн цолтой байж байгаад энгийн болж байгаа алба хаагчдын эрхзүйн байдлыг алдагдуулж болохгүй гэсэн үүрэг өгсөн. Тэгэхээр зарим хүний цол нь буурсан ч  цалин багасна гэсэн зүйл байхгүй. Үүнд засгийн газар зохицуулалт хийнэ.