Найз залуудаа 48 цагийн турш зодуулж амиа алсан гэх Н.Цэдэн-Ишийн шинжилгээний хариу нэлээн саадсанаас болж мөрдөн байцаалт удааширсан байгаа. Харин түүнийг үхэлд хүргэсэн байж болзошгүй Г.Алтанхүү гэгчийг Сүхбаатар дүүргийн цагдаагийн хоёрдугаар хэлтэст шалгаж байгаа ба одоогоор цагдан хоригдож байгаа юм. Харин  мөрдөн байцаалтын ажиллагаа дуусах дөхөж байгаа талаар сүүлийн үед хэвлэлүүд бичих боллоо. Энэ талаар   Нийслэлийн прокурорын орлогч Ц.Батболдоос тодрууллаа.

- Талийгаач Н.Цэдэн-Ишийн шинжээчдийн дүгнэлт архины хордлогонд амиа алдсан гэж гарсан гэсэн. Үнэн үү?
-Шинжээчдийн гурван удаагийн дүгнэлт гарсан. Дүгнэлтээр олон хоног дараалан архи уусны улмаас амиа алдсан гэж гарсан. Шинжээчдийн дүгнэлтийг танилцуулбал, архины гаралтай, элэгний эдийн үхжил үүсч, цөсний суваг, хүүдийн хананд гэмтэл үүсч, улмаар цөс шүүрч, хэвлийн гялтанг үрэвсүүлэн хэвлийн хөндийд шингэн хуралдах хавсарсан байдлаар элэгний үйл ажиллагаа доройтож, олон эрхтний дутагдалд орж нас барсан гэж гарсан. Тодруулбал, 2013 оны арваннэгдүгээр сарын 3-ны өдөр Г.Алтанхүү талийгаач нар нь өөрсдийн найз нөхдийн хамт караокед орж архидан согтуурч согтууруулах ундаа хэрэглэсэн байдаг. Тэгээд тэр өдрөө гэртээ ирээд 4,5-ны өдрүүдэд үргэлжлүүлэн архи уусан байгаа юм. Ингэж архи уух явцдаа буюу арваннэгдүгээр сарын 5-ны өдөр Г.Алтанхүү хувийн таарамжгүй харьцааны улмаас талийгаачийг зодож биед нь гэмтэл учруулсан нь мөрдөн байцаалтаар тогтоогдсон байгаа. Тухайн өдөр гэрт нь очсон гэрчүүдийн мэдүүлэг ч бий. Ингээд арваннэгдүгээр сарын 6-13-ны өдөр хүртэл талийгаач Г.Алтанхүү нар гэртээ байсан. Энэ хугацаанд талийгаач ажилдаа яваагүй. Харин 13-ны өглөө талийгаачийн эрүүл мэндийн байдал муудаж эмнэлэгт хандсан. Хоёр удаа мэс засалд орсон боловч арваннэгдүгээр сарын өглөө нас барсан байдаг.

-Тэгэхээр талийгаачийг амиа алдахад Г.Алтанхүү нөлөөлөөгүй гэж ойлгож болох уу?
-Мөрдөн байцаалтын явцад Г.Алтанхүү нь Н.Цэдэн-Ишийн биед хоёр удаа гэмтэл учруулж байсан нь тогтоогдсон. Тодруулбал, өнгөрсөн есдүгээр сард, мөн арваннэгдүгээр сард. Тэгэхээр Г.Алтанхүүгийн талийгаачийн биед учруулсан олон тооны гэмтлүүд нь талийгаачийн үхэлтэй холбоотой эсэхийг мөрдөн байцаалтын явцад нарийвчлан шалгана.

-Хэрвээ үхэлтэй нь холбоогүй нь тогтоогдвол яах вэ?
-Г.Алтанхүү үхлийн шалтгаантай холбоогүй болсон ч эрүүгийн хуульд заасан бусад зүйл заалтаар шалгана. Учир нь одоогийн байдлаар хоёр удаа гэмтэл учруулсан нь тогтоогдсон.

-Г.Алтанхүү Н.Цэдэн-Иш нар нь хэзээнээс хамт амьдарсан юм бол?
-Өнгөрсөн оны долдугаар сараас хойш хамт амьдарч байсан.