МХЕГ-ын даргын баталсан 01/08 тоот удирдамжийн дагуу барилгын салбарт гарч буй  удаа дараагийн  осол аваарыг бууруулах,  осол аваар гарахаас урьдчилан сэргийлэх зорилгоор Улаанбаатар хотын төвийн 6 дүүрэгт баригдаж буй 17 болон түүнээс дээш давхар барилга байгууламжийн ажлын явц байдал, барилга угсралтын үйл ажиллагаанд МХЕГ-аас шалгалт орууллаа. Тус хяналт шалгалтанд нийт 20 цогцолборын  51 барилга, 32 аж ахуй нэгж, байгууллага, 90 гаруй инженер техникийн ажилтан хамрагдсан байна.

Хяналт шалгалт хийх явцад Сүхбаатар дүүргийн 1-р хорооны нутаг дэвсгэрт байрлах “Шангри-Ла Улаанбаатар” ХХК-ийн захиалгаар барьж буй 2 дугаар ээлжийн  цогцолбор барилгаас бусад бүх цогцолборууд барилгуудын ажил хүйтний улирлаас шалтгаалан  зогссон байсан байна. 

Сүүлийн 9 жилд буюу 2005-2013 онд барилгын салбарт нийт  581 удаагийн үйлдвэрлэлийн осол гарч, 246 хүн осолд өртөж нас барж, 130 хүн тахир дутуу болж, 272 хүн хөдөлмөрийн чадвараа түр хугацаагаар алдсан байна.

Харин сүүлийн 2012, 2013 онд барилгын салбарт гарсан үйлдвэрлэлийн ослыг харьцуулан үзэхэд 2012 онд 69 удаагийн үйлдвэрлэлийн осол гарч 28 хүн үйлдвэрлэлийн осолд өртөж нас барж, 10 хүн тахир дутуу болж, 34 хүн хөдөлмөрийн чадвараа түр хугацаагаар алдаж байсан бол 2013 оны байдлаар нийт 39 удаагийн үйлдвэрлэлийн осол гарч түүнд 14 хүн өртөж нас барж, 18 хүн тахир дутуу болж, 9 хүн хөдөлмөрийн чадвараа түр хугацаагаар алдсан байна. Энэ судалгаанаас үзэхэд 2013 онд барилгын салбарт гарсан үйлдвэрлэлийн ослын тоо өмнөх 2012 оноос 43.3 хувиар буурсан ба осолд өртөж нас барсан иргэний тоо 50 хувиар бууч, осолд өртөж тахир дутуу болсон иргэдийн тоо 44.4 хувиар нэмэгдэж, хөдөлмөрийн чадвараа түр хугацаагаар алдсан иргэдийн тоо 73.5 хувиар буурсан байна. Харин 2014 он гарсаар барилгын салбарт хүний амь нас үрэгдсэн 5 осол гараад байгаа юм.