Нийслэлийн Сонгинохайрхан дүүрэгт үүссэн нөхцөл байдалтай холбогдуулан МХЕГ-ын даргын 81 тоот тушаалаар Өгөгдсөн үүргийг хэрэгжүүлэхээр 21 аймаг, нийслэлийн хэмжээнд архи, согтууруулах ундааны үйлдвэрлэл, худалдаа, үйлчилгээ эрхлэгчдийн үйл ажиллагаанд хийсэн шалгалтын дүнг танилцууллаа. Тодруулбал, Сонгинохайрхан дүүргийн Амьдрах ухаан сургалт, хүмүүжлийн төвд архинд хордож дөрвөн хүн нас барсан нь олныг сандаргаж эхэлсэн. Энэ байдлаас улбаалж архины үйлдвэрлэл худалдаа явуулдаг газруудад шалгалт хийсэн билээ.

Шалгалтаар улсын хэмжээнд 21 аймаг, нийслэлийн 9 дүүргийг хамруулан согтууруулах ундааны 31 үйлдвэр /архины 25, спиртийн 6 үйлдвэр/, согтууруулах ундаа худалдаалдаг, үйлчилгээ эрхэлдэг 5078 газрууд, 127 эм ханган нийлүүлэх байгууллага, 260 нийтийн үйлчилгээтэй эмийн сан, 19 эмийн үйлдвэр, 81 эмнэлэг, эрүүл мэндийн төв, 7 аймгийн эрүүл мэндийн газар гэнэтийн шалгалтыг хийжээ.

Шалгалтын явцад хүнсний дэлгүүрүүд, худалдаа байгууллагуудад худалдаалагдаж байгаа 21 нэрийн архи, согтууруулах ундаа нь хаяг шошгын зөрчилтэй байгаа нь "орц найрлага, гаж нөлөө, хориглох заалт, үйлдвэрлэсэн болон хадгалах хугацаа, нөхцөл, санамж, эрүүл мэндийн ахнааруулагагүй, үйлдвэрлэлийн хаяг, хэрэглэх арга, савлалтын хэмжээ, цувралын дугаар, нөхцөл зэргийг тэмдэглээгүй" байжээ.

"Шинэ эхлэл", "Хээр адуу", "Морьт хангай", "Тэргүүн трейд", "Хярын нуур" зэрэг үйлдвэрүүд нь "Савласан хүнсний бүтээгдэхүүний шошголтонд тавих ерөнхий шаардлага MNS CAC 1:2007,  "Цагаан болон өвөрмөц архи. Техникийн ерөнхий шаардлага MNS 179:2009-стандарт, "Хүнсний  бүтээгдэхүүний аюулгүй байдлыг хангах тухай" хуулийн 12 дугаар зүйлд заасан заалтуудыг тус тус зөрчиж байна".

Хяналт шалгалтын явцад хаяг шошгын зөрчилтэй 12266 ширхэг архийг битүүмжилж, "Их Монгол", "Буудай" гэх мэт 21 нэр төрлийн архинаас 151 дээж авч лабортарийн шинжилгээнд хамруулсан байна.

Шалгалтын явцад архи, согтууруулах ундааны үйлдвэрлэл, үйлчилгээ худалдаа эрхэлж буй ААНБ-ууд эм, ханган нийлүүлэх байгууллагуудад нийт 117 зөрчил илрүүлж, 20 аж ахуй нэгжид 54 заалт бүхий 20 албан шаардлагаар хугацаа дууссан 1071 шил архи, 849 ширхэг шар айраг, 8 шил дарсыг устгаж, зөрчил гаргасан 11 иргэн, хуулийн этгээдэд 3.416.0 мянган төгрөгийн торгуулийн арга хэмжээ авсан байна.

Дашрамд хийхэд "Амьдрах ухаан" сургалт үйлдвэрлэлийн тусгай төвтэй адил үйл ажиллагаа явуулж буй бусад газруудын судалгааг гаргасан байна. Ингэхэд Багануур дүүрэгт 4, Сүхбаатар дүүрэгт 2, Сонгинохайрхан дүүрэгт 15, Налайх дүүрэгт 1, Баянгол дүүрэгт 4, Чингэлтэй дүүрэгт 2, Баянзүрх дүүрэгт 4 нийт 32 газар, нийгмийн эмзэг бүлгийн гэр оронгүй хүмүүст халуун хоолоор үйлчлэх, түр байрлуулах, сургалт зохион байгуулах чиглэлээр үйл ажиллагаа явуулдаг байна.