“MCS пропертиз Холдинг” компанийн барьсан “Viva city“ залуусын хорооллын барилга дахин хэл ам дагуулж эхэллээ. Өрөөний талбай бага, ханын өнгөлгөө нь нэг удаагийн бороонд нурсан зэрэг янз бүрийн зөрчилтэй тус барилга уг нь ашиглалтад ороод удаагүй билээ. Саяхан л гэхэд тус хорооллын халуун, хүйтэн устай холбоотой санал гомдол Засгийн газрын "11 11" төвийг дарж орхисон.  Гэтэл одоо тус хорооллын байрнуудын гоожуураас битүү шавартай ус гарч, оршин суугчдын бухимдлыг хүргэх болсон байна. Үүнээс болж тус хорооллынхон усанд ч орж чадахгүй байгаа аж. Энэ талаар оршин суугчдын зарим нь "Манай байрны гоожуураас "шоколадтай ус" гарч байна хэмээн марзаганаж байгаа бол бусад нь "үнэгүй кофе, шавар эмчилгээг өдөржин авч" байна хэмээн бухимдаж сууна.

Чанар муутай хэмээн үргэлж шүүмжлүүлдэг тус барилгын сантекникийн асуудал хэл ам дагуулж эхлээд буй нь иргэдийг энэ хорооллын чанарт эргэлзэхэд хүргэж байна.