ГССҮТ-ийн даргын сонгон шалгаруулалтын дахин зарлаад байгаа. Улмаар дарга олддоггүй тус эмнэлгийг даргын үүргийг түр гүйцэтгэгч Ц.Энхбаярын талаар янз бүрийн яриа гарах болсон. Өөрөөр хэлбэл Ц.Энхбаярыг тамга тэмдгээ авч зугтаасан гэх мэтээр ярих болсон.  Тэгвэл энэ мэт ГССҮТ-ийг тойрсон асуудлаар Гэмтэл согог судлалын үндэсний төвийн захирал Ц.Энхбаяртай ярилцлаа.

-Гэмтэл согог судлалын үндэсний төвийн захирлыг дахин сонгон шалгаруулах гэж байгаа гэж сонслоо. Энэ үнэн үү?

-Гэмтлийн эмнэлгийн тухай зургаан сарын турш яригдлаа. Энэ талаар албан ёсоор маш олон удаа сонгон шалгаруулалт явагдлаа. Хамгийн сүүлд өнгөрсөн хоёрдугаар сард явагдсан сонгон шалгаруулалт дахиж болохоор зарлагдаад байна.
Миний хувьд ажлаа өнгөрсөн гуравдугаар сарын 26-нд өгсөн. Гадуур тамгаа аваад зугатаалаа, сайдаа шүүхэд өглөө гэсэн сөрөг мэдээлэл явлаа. Тэр бүрт цаг зав олдохгүй, няцаалт хийж чадахгүй байна. Энэ тухай албан ёсоор хэлэхэд тийм асуудал ерөөсөө болоогүй. Яамнаас комисс томилогдоод, ажлаа А.Өлзийбаатарт хүлээлгэж өгсөн. А.Мөнхтайван гэдэг хүн нэрээ татсан.

-Одоо хэчнээн хүн сонгон шалгаруулалтад орохоор байна. Энэ асуудлаас болж эмнэлгийн үйл ажиллагаа доголдох вий дээ?

-Би ажлаа Хүрэлбаатар гээд насанд хүргэгчдийн тасгийн эрхлэгчид өгсөн. Дараагийн сонгон шалгаруулалтаар гарч ирэх хүнийг ажлаа автал энэ ажлыг хавсран гүйцэтгэж байгаа. Манай багийнхан ажиллаж байгаа учраас эмнэлгийн үйл ажиллагаанд ямар нэгэн доголдол гарахгүй.

-Сүүлийн сонгон шалгаруулалт зарлагдчихлаа. Та өрсөлдөх үү?
-Бодож байгаад шийднэ. Зарлагдаад хэдхэн хонож байна. Энэ сарын 22 хүртэл бүртгэнэ.

-Өмнөх сонгон шалгаруулалтын шаардлага докторын зэрэгтэй хүн байна гээд та хасагдсан байх аа?

-Өмнөх сонгон шалгаруулалт өндөр шалгууртай байсан. Эрүүл мэндийн салбарт 20-оос дээш жил ажилласан, удирдах албан тушаалыг 10-аас дээш жил хашсан, анагаах ухааны доктор зэргээр шалгуур тавьж байсан. Тэр шалгаруулалтад зургаан хүн оролцсоноос нэг хүн тэнцсэн ч нэрээ татчихсан. Тиймээс дахин сонгон шалгаруулалт зарлалаа.

-Энэхүү үйл явдлын талаар таны өөрийн байр суурийг сонсмоор байна?
-Би өнгөрсөн оны есдүгээр сарын 23-нд Эрүүл мэндийн сайдын томилгоогоор ГССҮТ-д очсон. Сайдын эрх мэдлийн хүрээний жинхэнэ томилгоо байсан. Зургаан сар ажиллалаа. Намайг очихоос өмнө түр хороо байгуулагдчихсан, энэ эмнэлэг олон сар эзэнгүй, даргагүй байсан. Дараагийн хүн ирэхэд түр хороо байгуулагдаад, ажил хаялт зарлачихсан. Тэнд ороод ажилласан. Нөхцөл байдал маш хүнд байсан. Эмнэлгийн хувьд улсынх мөртлөө хувийн юм шиг байдалтай. Гэхдээ бүх ажилтан биш хэдхэн эмч нарын зохион байгуулалттай асуудал байсан. Ер нь мөнгөний сүлжээнд орчихсон, гаднаас хүн ирээд тэр сүлжээг нь мэдчих вий, зогсоох вий гэсэн байдалд байсан.

-Мөнгөний сүлжээнд орсон гэдгийг тайлбарлахгүй юу?
-Миний хувьд зургаан сарын турш ажиллахад эмнэлэгт болж буй бүхий л процессыг үзэж харсан.

-Тухайлбал, ямар сүлжээ байсан гэж?
-Оношлогоо, эмчилгээний чиглэлээр гэж ялгавал иргэдэд арай ойлгомжтой байх. Оношлогооны чиглэл гэвэл гэмтэж бэртсэн хүмүүс ирнэ. Тэднийг ирэхэд компьютер, эмира аппарат нь муу, шаардлага хангахгүй. Дотор нь ажиллаж байгаа эмч нар нь эмнэлгийн гадна хэд хэдэн эмнэлэг байгуулчихсан. Тэндээ компьютер, эмирагаа байрлуулчихсан, хүмүүсийг үзэж оношилдог. Сандарч тэвдсэн хүмүүсийн сэтгэлзүйгээр маш их тоглодог. Гэнэтийн осолд орсон хүмүүс бүгд сандарладаад ирдэг. Гэтэл тэд эмчийн хэлсэн үг, мөнгөний тоог гүйцэлдүүлэхээр давхидаг. Гэмтсэн хүнээ босгож байвал бусад нь яахав гэж боддог. Ийм сүлжээ байсан. Ард нь дандаа мөнгө эргэлдэж байдаг.

-Тийм чиглэлээр ажиллаж байгаа эмч, ажилтнуудыг нэрлэж чадах уу?
-Тухайлбал, "Бриллиант" эмнэлэг бий. Тэнд рентгений эмч нар ажиллаж байх жишээтэй. "Мөнгөн гүүр" гэж эмнэлэг байгаа. Тэнд дижитал рентген ажиллаж байна. Эмч нар нь манай эмнэлгийн рентген тасагт ажилладаг. Гэмтлийн эмнэлэгт ирсэн хүмүүсийг үүднээс нь цааш буцаадаг. Эмнэлгийн гадна ямар орчин байгаа билээ. Машин битгий хэл хүн зөрөх газаргүй болчихсон. Тийм орчинд өвдөж зовсон хүмүүс буцаад эмч нарын хэлснээр хувийн эмнэлэгт нь очдог хүндрэлтэй байдал үргэлжилсээр байна. Эмчилгээний чиглэлээр гэвэл өвчтнүүдийг хагалгаанд оруулж гэмтэж, хугарсан ясыг барьж боодог болчихсон. Дээр үед гаднаас нь бариад чиг тавьдаг байсан бол одоо нээгээд ясыг нь гаргаж ирээд эвэнд нь оруулаад бэхлэчихдэг болсон. Хиймэл түнх, нуруу нугасны бэхэлгээ зэрэг бүгд бизнесийн сүлжээнд орчихсон. Нэг түнхийг зургаан сая хүртэлх төгрөгөөр хийнэ гэдэг. Гэтэл улсаас тодорхой хэмжээний хөрөнгө гаргадаг. Тухайлбал, 2014 оны тендерийг бид явуулсан. Нэлээн үнэнч шударгаар явуулсан. Үүнд гэхэд зөвхөн хадаас бэхэлгээг авахад улсын төсвөөс 600 сая төгрөг төсөвлөж байна. Гэтэл энэ хэрэгсэл хааччихав. Өнгөрсөн долоо хоногт болсон жишээ хэлье л дээ. Нэг өвгөн шуугаараа гараа хугалчихаад Гэмтэлд иртэл зургаан сая төгрөг нэхсэн. Ямар ч үндэслэл байхгүй, эмч нарын аманд нь орсон тоо. Тэр ядарсан өвгөнд улсаас өгсөн хадаасыг нь тавиад явуул л даа. Энэ чинь улсын эмнэлэг, улсаас цалинжиж байна. Гэтэл тэр өвчтөн бүх ах дүү нараасаа мөнгө цуглуулаад таван сая төгрөг арай гэж цуглуулаад, цаана нь дахиад нэг сая төгрөг дутчихсан байна. Үүний оронд улсаас авч өгсөн хэрэгслийг нь тавиад, үнэгүй хагалгаа хийж өгөөд даатгалаас нь мөнгийг нь авчих ёстой. Энэ бол наад захын жишээ. Үүнийг өөрчлөх ёстой байсан. Цаг хугацааны хувьд арай амжсангүй. Ер нь эрхзүйн хувьд бүгдийг нь өөрчилж чадсан. Бид зургаан сар үүрэг гүйцэтгэхдээ бараг зургаан жилийн ажлыг хийчихсэн. Яагаад гэвэл маш их бугшчихсан, хэдхэн хүмүүс монопольчихсон. Тухайлбал, тасгийн бага эмч, эрхлэгч хоёр нэг тасаг авч явдаг. Гэтэл тэд олон жил тэндээ ажиллаж. Бага эмч гэхэд 20 орчим жил ажиллаж байх жишээтэй. Тасгийн эрхлэгчтэйгээ нэг вант улс болчихсон, дандаа цаана нь мөнгөний сүлжээ явагдаж байх жишээтэй. Үүнийг бүгдийг өөрчилсөн. Тэдний доор маш олон чадварлаг хүмүүс байна. Гэтэл тэмцээд байгаа ёсзүйгүй хэдхэн хүмүүс залуусаа хагалгаандаа оруулдаггүй монополь байдлыг бий болгочихсон. Хүмүүсээс хайр найргүй мөнгө нэхдэг ийм байдлыг өөрчилөхийн төлөө ард иргэдийн төлөө эмнэлгийг эмнэлэг шиг эмнэлэг болгохын төлөө зургаан жил ажилласан. Хэцүү хүнд асуудлыг давсан.

-Таныг 20 гаруй эмч, ажилтныг халсан гэж мэдэгдээд байсан?
-Өөрсдөө өргөдлөө өгөөд халагдсан хэсэг хүмүүс бий. Тэд өөрсдөө халаад өг гэж өрөөнд орж ирчихээд байсан мөртлөө халангуут “Халчихлаа” гэж шүүхдээд яваад байх юм. Шүүхэд өөрсдийнх нь гарын үсэгтэй материалуудыг өгчихсөн. Эцсийн байдлыг шүүх шийднэ биз.

.