Монголын сагсан бөмбөгийн лигийн дөрвөн удаагийн аварга “SBL Хасын хүлгүүд” клубийн 10 жилийн ой энэ онд тохиож буй.

Тус клуб ойн баярынхаа хүрээнд АНУ-ын NCAA-гийн нэгдүгээр дивизионы тоглогчдоос бүрдсэн “USA Eagles” багийнхантай нөхөрсөг тоглолт хийхээр эх орондоо урьжээ.

Энэ дагуу “USA Eagles” багийн ерөнхий менежер Люк Сайммонс, ерөнхий дасгалжуулагч Жон Яакус, туслах дасгалжуулагч Жо Маззулла, Зек Малотр болон 10 тоглогч маргааш Улаанбаатарт ирэх гэж байна.

Тэд “SBL Хасын хүлгүүд"-ээс гадна манай улсын Үндэсний шигшээ багийнхантай тоглох юм. Тодруулбал тэд энэ сарын 25-нд “SBL Хасын хүлгүүд”-тэй, энэ сарын 26-нд Үндэсний шигшээ багийнхантай тоглох бөгөөд дээрх тоглолтууд Спортын төв ордонд болно.