24tsag.mn сайт уншигчиддаа зориулж гадаад улсад өөрийн улсын нэрийг гаргаж, авьяас чадвараа үнэлүүлж яваа монгол залуусынхаа талаар “гэгээлэг” мэдээллүүдийг хүргэдэг билээ. Энэ удаад Төваймгийн Сүмбэр сумын уугуул иргэн Т.Тодбаярын талаарх мэдээллийг бэлтгэлээ. Тэрбээр Монголын дүрслэх урлагийн сургууль, Солонгосын Бусан хотын “Донг-А” их сургуулийн уран зургаар мастер хамгаалсан. Дүрслэх урлагт суралцаж байх хугацаандаа Монголын урчуудын эвлэлийн хорооноос зохион байгуулдаг “Хавар”, “Намар”, “Алтан бийр” гэх мэт үзэсгэлэнгүүдэд удаа дараалан оролцож байсан юм. Мөн олон улсын томоохон үзэсгэлэнгүүдэд оролцож байсан ба үүнээс БНСУ, Хятад, Японы хамтарсан үзэсгэлэнгүүдийг нэрлэж болох юм.
Улмаар энэ сарын 19-нд анхны бие даасан “Монголын үнэр” үзэсгэлэнгээ Бусан хотын К галлерейд гаргасан бөгөөд энэхүү үзэсгэлэн нь энэ сарыг дуустал буюу тавдугаар сарын 31-нийг хүртэл үргэлжлэх юм байна.