Өнөөдөр Автотээврийн үндэсний төвийнхөн сэтгүүлчидтэй зангиагүй уулзалт хийж ажил үйлчилгээнийхээ талаар дэлгэрэнгүй ярилцлаа. Энэ үеэр тус төвийн захирал, НИТХ-ын төлөөлөгч Т.Болдбаатараас дараах зүйлийг тодрууллаа.

-Энэ онд тээврийн салбарт хийгдсэн дорвитой, томоохон ажлуудаас нэрлээч?
-Байршил тогтоох төхөөрөмжинд суурилсан ухаалаг систем байгаа. Хамгийн эхний ээлжинд хот хоорондын зорчигч тээвэрт явж байгаа бүх том, дунд оврын тээврийн хэрэгслийг хянаж байна. Тухайлбал, Улаанбаатараас Ховд руу гараад явлаа гэхэд тэр тээврийн хэрэгслийн байршил, хурд, хөдөлгүүрийн төлөвийг тогтоож  байгаа. Энэ бүхнийг хянаж байгаа Хөдөлгөөний удирдлагын төвийг байгуулсан.

Мөн мэдээлэл дамжуулах систем бүх төрийн байгууллагуудыг холболоо. Нэг байгууллага дээр мэдээлэл хаалттай байдаг байсан бол өнөөдөр бид төрийн найм орчим байгууллагатай холбогдож техникийн хяналтын үзлэгг, хот хоорондын зорчигч тээвэр бүх талын мэдээллээ солилцож байгаа. Техникийн хяналтын үзлэгийн төвийг Сонгинохайрхан төвд дахин нээсэн. Иргэдэд хүндрэл чирэгдэлгүй үйлчлэх үүднээс цагийн хуваарийг ч уртасгасан.

Дашрамд хэлэхэд, Авто тээврийн талаарх бодлого УИХ-аар хэлэлцэгдэх гэж байгаа чухал үе ирээд байна.

-Авто тээврийн салбарын хөгжлийн бодлогыг төрөөс зохицуулдаггүй гэсэн үү?
-Авто тээврийн салбарын хөгжлийн бодлого манайд төвлөрөхгүй байна гэсэн асуудал яриагүй. Авто тээврийн салбарын бодлогыг Зам тээврийн яам барих ёстой. Харин авто тээврийн талаар төрөөс баримтлах бодлогогүй явсан. Тухайлбал, төмөр замын талаар төрөөс баримтлах бодлого гарсан байдаг. Харин авто тээврийн салбарт төрөөс баримтлах бодлогогүй явсан. Гэвч одоо бодлогоо тодорхойлоод УИХ-аар батлуулахаар оруулсан байгаа.

-Авто тээврийн хэрэгслээр нүүрсний тээвэрлэлт хийдэг. Тээвэрлэлтийн өсөлт, бууралт хэр байна?
-Энэ жил нүүрсний тээвэр сайн явагдаж байгаа. Өнгөрсөн 2013 онд уул уурхайн бүтээгдэхүүн 23 сая тонн тээвэрлэгдсэн байдаг. Өнгөрсөн 2013 оны эхний таван сарын байдлаар 5 сая тонн нүүрс тээвэрлэгдсэн байдаг. Энэ жилийн эхний таван сарын байдлаар 6.6 сая тонн тээвэрлэгдсэн байна. Өнгөрсөн жилийнхээс 25 орчим хувиар өссөн гэсэн үг.

-Хот хоорондын зорчигч тээврийн үйлчилгээний стандарт гэж байдаг уу. Энэ үйлчилгээг үзүүлж буй газруудад хяналт тавьдаг уу?
-Ер нь зорчигч тээврийн гол барих зарчим бол нэгдүгээрт, аюулгүй байдал. Хоёрт, тав тухтай байдал. Хот хоорондын зорчигч тээвэрлэлтийн талаар төрөөс баримталж байгаа бодлогын хэмжээнд дорвитой тодорхой ажлуудыг зохион байгуулж ажиллаж байгаа. Нэгдүгээрт, хот хоорондын зорчигч тээврийн хэрэгсэлд тавигдах стандартыг бол шинэчлэн батлах ажлын хэсэг батлагдсан. Хоёрдугаарт, авто тээврийн тухай төрөөс баримтлах бодлогын баримт бичиг батлагдана. Яг үүнтэй уялдуулаад хот хооронд зорчигч үйлчилгээ үзүүлж байгаа аж ахуй нэгж байгууллагуудад сонгон шалгаруулалт буюу тавигдах шаардлагууд нь батлагдах ёстой.  Хот хоорондын нийтийн тээврийн хэрэгсэлд явж байгаа тээврийн хэрэгслийг стандартын дагуу, их багтаамжийнх болгохын төлөө зорилт тавьж ажилласан. 2010 онд 45 хүний суудалтай автобус 105 ширхэг байсан бол өнөөдрийн хэмжээнд 385 ширхэг болж цаг, давтамжуудыг нэмэгдүүлсэн. Түүнчлэн хот хооронд явж байгаа тээврийн хэрэгсэл бүрт хяналтын камер тавьсанаараа олон олон давуу талыг авчирж байгаа.

-Авто тээврийн оношлогоо гэж жил бүр явагддаг. Улмаар тодорхой хэмжээний хураамж авдаг. Тэгвэл оношлогооноос хэчнээн төгрөг танайд төвлөрдөг юм. Төвлөрсөн мөнгө юунд зарцуулагддаг юм?
-2004 онд анх батлагсдан тарифаараа техникийн хэрэгслийн оношлогооны мөнгө боддог. Тодруулбал, суудлын тэрэг 10 мянга, ачааны болоод том оврын машин 15000, чиргүүл, мотоцикл 5000 төгрөгний үнэлгээтэй байгаа.

-Өнгөрсөн жил 400 гаруй техник үзлэгт хамрагдсан. Өнгөрсөн жилийг дуустал улсын төсөвт бүх орлогоо тушааж явсан.  Улмаар хэр хэмжээний орлого тушаасан тэр хэмжээгээрээ эргэж санхүүжиж явж байсан. Харин энэ жилийн хувьд улсын төсөв хүндэрсэн учир бид өөрийгөө санхүүжүүлэх буюу аж ахуйн тооцооны хэлбэрээр Засгийн газрын тогтоол гараад  Аж ахуйн тооцоонд шилжээд ажиллаж байгаа. Түүнчлэн бид Улсын төсөвт ноогдол ашгийн хэлбэрээр олсон орлогоо тушааж байгаа.