Хүн төрөлхтөний бий болгосон олон гайхамшигтай зүйлийн нэг нь спорт, спортын хаан нь хөлбөмбөг, хөлбөмбөгийн оргил нь ДАШТ билээ. Дэлхий нийтээрээ дөрвөн жил хүсэн хүлээдэг агуу баяр эхлэхэд ердөө ганцхан хоног үлдлээ. 20 дахь удаагийн ДАШТ маргааш буюу энэ сарын 12-ны үдэш тэмцээнийг зохион байгуулагч Бразил болон Хорватын шигшээ багийн тоглолтоор эхэлж, бүтэн сарын турш үргэлжилэх юм. Тэмцээн ирэх долдугаар сарын 13-нд өндөрлөх бөгөөд энэ л үдэш дэлхийн аварга багийн нэр тодрох юм.

Хөлбөмбөгийн түүхийн өмнөх 19 удаагийн ДАШТ-д 772 тоглолт болж, 2208 гоол оржээ. Мөн 19 удаагийн дэлхийн аварга шалгаруулах тэмцээнд 6598 хөлбөмбөгч оролцсон байна. ДАШТ-ний 772 тоглолтыг 34 сая 70 мянга 837 хөгжөөн дэмжигч цэнгэлдэх дотроос буюу дэргэдээс нь үзэж, дэмжсэн гэсэн тоо баримт байна.

Мөн энэхүү агуу тэмцээнд найман улсын шигшээ баг  түрүүлсэн байдаг. Үүнээс довтолгоо, уран гоё тоглолтыг эрхэмлэдэг Бразилийн шигшээ таван удаа ДАШТ-ий алтан цомыг өргөсөн. Хамгаалалтаараа алдартай Италийн шигшээ дөрвөн удаа цомыг хүртсэн. Харин нягт нямбай, чанга зохион байгуулалттай тоглодог Германы шигшээ гурван удаа ДАШТ-д түрүүлжээ.

ДАШТ-ий хамгийн нэр хүндтэй шагнал бол тэмцээний мэргэн буучид олгодог “Алтан шаахай” юм. 1958 оны ДАШТ-д Францын домогт хөлбөмбөгч Жюст Фонтен 13 гоол оруулсан нь өдийг хүртэл дээд амжилт хэвээр байна. Жюст Фонтен шиг нэг ДАШТ-д 13 гоол оруулсан хөлбөмбөгч үгүй. Харин ДАШТ-ний бүх цаг үеийн мэргэн буучийг 15 гоол оруулсан Бразилийн алдарт Роналдо тэргүүлсээр байгаа юм. Роналдо 1998, 2002, 2006 оны гурван ДАШТ-д оролцсон билээ. Роналдогийн ард 14 гоол оруулсан Германы шигшээ багийн “Алтан толгойт” хочит Мирослав Клозе бичигддэг юм.