УДЭТ-ын уран бүтээлчдийн хэрэгжүүлж буй бэсрэг жүжгийн төслийн тав дахь жүжиг  “Манекен” өнөөдөр үзэгчдийн хүртээл болно.

 Николай Колядагийн зохиол,  СТА Ц.Батнайрамдалын найруулсан сэтгэхүйн энэхүү жүжгийг гурван өдөр тоглох юм. Оюун санаа үзэл бодлоороо нийгмээсээ хоцрогсод нь хуучин нийгмийнхээ хувцас өмсгөлийг өмссөн манекен мэт харагддаг. Тэрхүү санааг хотоос алслагдсан төмөр замын өртөөнд амьдардаг хоёр бүсгүйн амьдралаар харуулах аж. Уйтгартай дүнсгэр амьдралаас залхсан хоёр бүсгүй гэрэл гэгээ хайж, хэн нэгэн тэднийг эндээс авч явахыг мөрөөддөг. Гэвч тэдэн дээр хэн ч ирсэнгүй. Тэд хүлээсээр л. Гэтэл нэг өдөр өртөөний уурын зууханд Петр хэмээх залуу ажилд орсноор жүжгийн үйл явдал сонирхолтойгоор өрнөнө. Хоёр бүсгүйн Петрийг өөрийн болгох гэсэн өрсөлдөөн, тулаан эхэлнэ.

Төслийн хүрээнд энэхүү жүжгийн дараа УГЗ Б.Баатар, Э.Ёндоншарав нар А.Очирбатын “Буруугүй буруутан” уянгын драм, УГЗ Ч.Найдандорж Дарио Фогийн “Чөлөөт хос” инээдмийн жүжиг нээлтээ хийх юм.