ЦЕГ-ын Нийтийн хэв журам хамгаалах газрын Замын хөдөлгөөний аюулгүй байдлын хэлтсээс орон нутгийн замд гарч байгаа зам тээврийн осол, аваарын талаар мэдээлэл хийлээ. Энэ үеэр тус хэлстийн дүн шинжилгээ хариуцсан ахлах мэргэжилтэн, дэд хурандаа Ц.Сугаржаваас зарим зүйлийг тодрууллаа.

-Орон нутгийн замд осол аваар их гарч тэрнийхээ хэрээр иргэд хохирч байна. Энэ тоо ийн ихэссээр байгаа шалгаан юунд байна?
-Хурд хэтрүүлж, согтуугаар тээврийн хэрэгсэл жолоодож, анхаарал болгоомжгүйгээр хөдөлгөөнд оролцож байгаагаас зам тээврийн осол ихээр гарч байна. Мөн  тээврийн хэрэгслээр зорчиж буй зорчигч, жолооч нар хамгаалах бүсийг хэрэглэхгүй байгаагаас ослын үеэр гэмтэл авах магадлал нь өндөр байна. Дээр нь орон нутагт мотоциклтэй холбоотой зам тээврийн осол нэлээдгүй гарч байгаа. Орон нутгийн малчид, иргэд өдөр тутмынхаа хэрэгцээнд мотоциклийг ихээр унаж ашигладаг болсон. Тэрэнтэй холбоотойгоор хамгаалах малгайг өмсөж хэвшээгүй байдаг. Улмаар онхолдож гэмтэх үедээ тархиндаа гэмтэл авч амь насаа алдах нь их байна.

-Орон нутгийн замд нийтийн тээврийн үйлчилгээ эрхэлж байгаа автобуснууд осол аваар гаргах нь хэр байна?
-Автобусуудад GPS систем суурилуулсан байгаа. Энэ системийг бид Авто тээврийн үндэсни төвтэй хамтарч хяналт тавьж ажиллаж байгаа. Эдгээр тээврийн хэрэгслүүдийн автобуснуудын хурд хэмжиж байгаа мэдээллийг манайх өдөр тутам хяналтандаа авч тэр талын мэдээллийг аваад Улаанбаатар хотоос гарч байгаа төв замууд дээр байгаа постуудын албан хаагчдаар дамжуулан хяналт тавьж байгаа. Ер нь цаашид автобуснаас бусад нийтийн тээврийн хэрэгслүүдэд GPS суулгах асуудлыг бид Авто тээврийн үндэсний төвтэй ярилцаж байна. 

-Мотоциклийн ослын дийлэнх нь хятад мотоциклоос үүдэлтэй. Тэгвэл хятад мотоциклийн импортыг зогсоож чадахгүй энэ үед өөр ямар арга байна вэ?
-Манайх энэ асуудалд олон байгууллагатай хамтран анхаарч ажилладаг.  Улсын хилээр орж ирж байгаа мотоциклд  ч хяналт тавьж байгаа.

-Орон нутагт зам тээврийн ослууд ихээр гарч байгаа. Тэгэхээр яг аль алт хэсэгт осол гарах нь их байгаад байна?
-Ер нь хамгийн их осол гардаг цэг нь Улаанбаатараас 150-180 км-ийн радуст байрлах төвийн бүсийн аймгуудын нутаг дэвсгэр дээр авто тээврийн ослын дийлэнх нь гарч байгаа. Энд бол нэгдүгээрт хөдөлгөөний ачаалал их байна. Хоёрдугаарт эрсдэл нь их байна. Энэ хавар орон нутгийн зам нэлээд гэмтсэн. Хагарч муудсан. Энэ талаар бусад аймгуудаас судалгаа аваад зам тээврийн яаманд засч янзлуулах шаардлагатай гэх саналыг хүргүүлсэн.
Ерөнхийдөө хойд  чиглэлийн буюу Дархан чиглэлд, урагшаа Дорноговь, Замын-Үүд рүү шинэ зам баригдсантай холбоотой иргэд машинаар зорчих нь их болсон. Мөн Налайх, Хонхор орчимд дийлэнх осол гарч байна. Энэ зам нарийхан, хөдөлгөөний ачаалал ихтэй. Автомашин жолоодсон иргэд цувраад явж чадахгүй бие биендээ хүлээцгүй хандаж гүйцэж түрүүлсэнээс мөргөлддөг байгаа.

-Хөдөө орон нутгийн замд гүйцэж түрүүлэх үйлдэл хийхээр осол их гарч байна гэлээ. Энэ ер нь дугуйтай холбоотой юу?
-Манай улс баруун гарын дүрэмтэй. Зөв талдаа жолоотой машин унаж хэрэглэх ёстой. Гэтэл одоо буруу талдаа жолоотой машин буюу  зүүн гарын дүрэмтэй Япон, Англи мэтийн улсын хэрэглэдэг машин тэр чигээрээ манайд ороод ирсэн. Тэгэхээр гүйцэж түрүүлэх үед нь жолоочид харагдах байдал талаас нь нөлөөлж хурдтай явсан тохиолдолд ямар нэг арга  хэмжээ авч чадахгүй аваар осол гаргадаг.

-Хурд хэтрүүлэхээс гадна жолоочийн зүгээс ямар ямар зөрчил гаргадаг вэ?
-Хяналтын постууд яг одоо байгаа цагдаагийн албанд хэрэглэгдэж байгаа бүх техник хэрэгслээр тоноглогдсон. Өөрөөр хэлбэл, хурд хэмжигч, камер, GPS гэх мэт. Бидний зүгээс хамгаалах бүс зүүсэн эсэх дээр их анхаарч байгаа.

-Ер нь орон нутгийн замууд их нарийхан байдгаас осол аваар гардаг байх. Замын өргөн хэдтэй байх ёстой вэ. Тухайлбал Налайхын зам их нарийн байдгаас осол аваар их гардаг шүү дээ?
-Налайхын зам өргөн буюу гурван гурван эгнээтэй зургаан урсгалтай зам болохоор зураг төсөл нь хийгдсэн байгаа. Тэр нь хөрөнгө төсвөөсөө болоод одоо болтол баригдаагүй байгаа. Ер нь орон нутгийн замын өргөн 7 метр байх ёстой. Мэдээж хажуу талдаа зорчих хэсэг, хөвөө зам чөлөөлдөг дүрмийн дагуу стандарттай байх чухал.