Найр наадмын сар үргэлжилсээр байна. Энэ жил 100 орчим сумдын тэгш ой тохиож байгаа бөгөөд үүнээс дийлэнхи 90 жилийн ойгоо тэмдэглэж байгаа юм. Ингээд энэ жил тэгш ойн баяраа тэмдэглэж буй сумдыг танилцуулж байна.

Архангай

Чулуут,  Жаргалант, Хайрхан, Батцэнгэл, Өлзийт  зэрэг сумын  90 жилийн ойн баяр наадам 7-р сарын 25, 26-ны өдрүүдэд зохион байгуулагдана.

Баянхонгор

Өлзийт, Жинст, Баацагаан, Бууцагаан, Хүрээмарал, Баянбулаг, Гурванбулаг, Заг зэрэг найман сум 90 жилийн ойн баяраа энэ сарын 16-20-ны өдрүүдэд тэмдэглэн өнгөрүүлэх юм.

Булган

Дашинчилэн, Хутаг-Өндөр, Хангал, Бугат  дөрвөн сумын 90, Рашаант сумын 30 жилийн ой энэ сарын 25, 26 -ны өдрүүдэд болно.

Говь-Алтай

Хамгийн олон сум түүхт ойгоо тэмдэглэх аймаг бол Говь-Алтай. Дарви, Бугат, Есөнбулаг, Халиун зэрэг дөрвөн сумаас бусад 14 сум 90 жилийнхээ тэгш ойг ирэх 8-р сарын 1-3-ны хооронд тэмдэглэн өнгөрүүлнэ.

Дархан-Уул

Шарын гол сум 20 жилийн ойгоо энэ сарын 19, 20-ны өдрүүдэд буюу өнөөдөр маргааш хоёр өдөр тэмдэглэнэ.

Дорноговь

Ойтой сумдынхаа тоогоор Дорноговь аймаг хоёрт бичигдэж буй. Энэ жил тус аймгийн Сайншанд, Улаанбадрахаас бусад 12 сум түүхт ойгоо тэмдэглэх бөгөөд Мандах, Сайхандулаан гэсэн хоёр сумын ой хэдийн болоод өнгөрчээ. Хатанбулаг 7-сарын 25-27- нд, Хөвсгөл 7- сарын 24-26-нд баяраа тэмдэглэхээр тогтжээ. Харин бусад сумын ой хэзээ болох нь  одоогоор тодорхойгүй байна.

Дорнод

Аймгийнх нь баяр наадам 7-р сарын 25, 26-ны өдрүүдэд болох бөгөөд Баян-Уул сумын 90 жилийн ой энэ сарын 14-16-нд болоод өнгөрсөн байна. Харин Булган, Матад сумын 90 жилийн ой 7-р сарын 20, 21-нд, Халхгол сумын 90 жилийн ой, Вангийн Цагаан уулын тахилга баяр наадам  8-р сарын 16, 17-нд  болох аж.

Дундговь

Луус ,Гурвансайхан, Өлзийт, Говь-Угтаал, Цагаандэлгэр, Сайнцагаан, Өндөршил сумууд 90 жилийн ойгоо тэмдэглэсэн байна. Харин аймгийн баяр наадам  энэ сарын 25, 26-нд болох аж.

Завхан

Завхан аймгийн хувьд 10 сумын ой өнөө жил тохиож буй. Отгон, Дөрвөлжин, Сантмаргаз, Яруу, Сонгино, Баянхайрхан, Баянтэс,  Шилүүстэй, Ургамал зэрэг  сумын 90, Асгат сумын 30 жилийн ойн баяр наадам  7-р сарын 17-28-ны хооронд зохион байгуулагдана.

Өвөрхангай

Баян-Өндөр, Баянгол, Богд  Бат-Өлзий, Баруунбаян-Улаан, Төгрөг, Тарагт, Хужирт, Гучин-Ус зэрэг сумын 90 жилийн ойн баяр наадам 7-р сарын 18-29-ний хооронд тус тус зохион байгуулагдах аж. Үүнээс Хужирт сумын ой өчигдөр эхэлсэн бөгөөд их аварга Д.Дагвадорж зодоглосоныг та бүхэн дуулсан биз ээ.

Өмнөговь

Өмнөговьчууд Батмөнх даян хааны мэндэлсний  550 жилийн ойг бүтэн жилийн турш нижгэр тэмдэглэж буй. Аймгийн наадам ч гэсэн их хааны мэлмий гийсний баярт зориулагдах бөгөөд  7-р сарын 25, 26-нд зохион байгуулагдах аж. Харин Цогтцэций , Ханбогд ,Баян-Овоо, Номгон, Ханхонгор,Манлай зэрэг сумын 90, Гурвантэс сумын 60 жилийн ойн баяр наадам 8-р сарын 8-нд нэг өдөр болно.

Сүхбаатар

Уулбаян, Эрдэнэцагаан, Сүхбаатар  сумдын 90, Түмэнцогт сумын 60 жилийн ойн арга хэмжээ энэ сарын 23, 24-ний өдрүүдэд зохион байгуулагдах аж.

Сэлэнгэ

Шаамар,  Зүүнбүрэн,  Цагааннуур, Түшиг, Ерөө зэрэг таван сум 90 жилийн ойгоо хэдийн тэмдэглэн өнгөрүүлжээ. Харин Баруунбүрэн 7-р сарын 24, 25-нд, Мандал 8-р сарын 1, 2-нд  тус тус түүхт 90 жилийн ойгоо тэмдэглэх аж.

Орхон
Монголын хамгийн хүн амтай  Баян-Өндөр сум 20 жилийн ойг тэмдэглэн өнгөрүүлжээ.

Төв

Лүн, Өндөрширээт, Эрдэнэ, Батсүмбэр Угтаалцайдам, Бүрэн зэрэг сумдын 90 жилийн ойн баяр наадам хэдийнээ болоод өнгөрчээ. Харин Сэргэлэн, Баян, Баянцагаан сумын 90 жилийн ойн баяр наадам  өчигдөр эхэлсэн бөгөөд өнөөдөр өндөрлөх юм байна.

Увс

Зүүнхангай ,Завхан, Ховд Өмнөговь, Бөхмөрөн, Тэс зэрэг сумын 90 жилийн ойн баяр наадам  7-р сарын 16-наас  8-р сарын 4-ний хооронд  болох аж.

Ховд

Олон ястны өлгий нутгийн Дарви, Алтай сумын 90 жилийн ойн баяр наадам энэ сарын 19, 20-нд, Мандал, Цэцэг сумын 90 жилийн ойн баяр наадам  8-р сарын 3, 4-нд болох бөгөөд Зэрэг сумын ойн баяр наадмын тов одоогоор гараагүй байна.

Хөвсгөл

Аймгийн баяр наадам энэ сарын 25, 26-нд, харин Тосонцэнгэл, Галт, Шинэ-Идэр  сумдын 90 жилийн ой  өчигдөр өндөрлөжээ.

Хэнтий

Норовлин сум 90 жилийн ойгоо тэмдэглэн өнгөрүүлсэн бол Галшар сумын ой өнөөдрөөс эхэлж энэ сарын 21-нд өндөрлөх юм. Мөн энэ жил Бэрх сумын  60 жилийн ой тохиосон байна. Түүнчлэн Мөрөн суманд 7-р сарын 25, 26-ны өдрүүдэд Түмэн адууны баяр болох аж.