Бүгд Найрамдах Итали Улсын хойд хэсэгт оршдог Феррара хот нь жил бүр ардын урлагийн олон улсын “Ferrara Buskers” хөгжмийн наадам зохион байгуулдгаараа Европ болон дэлхий нийтэд танигдсан хот юм.

1988 оноос хойш зохиогдож буй уг наадмын 27 дахь удаагийн арга хэмжээ энэ сарын 21-31-ний өдрүүдэд болох бөгөөд Монголын ардын урлагийн чиглэлээр уран бүтээл туурвидаг Хулан, Хөх Монгол, Седаа, ТрансМонголиа зэрэг хамтлаг, дуучид хүндэт зочноор уригдан оролцохоор болжээ.

27 дахь удаагийн “Ferrara Buskers” олон улсын хөгжмийн наадмын хөтөлбөрийг танилцуулах арга хэмжээний үеэр БНИУ-ын Соёл, аялал жуулчлалын сайд Дарио Франческини үг хэлсэн бөгөөд Монгол Улсаас БНИУ-д суугаа Онц бөгөөд Бүрэн эрхт Элчин сайд Ш.Одонбаатар энэхүү олон улсын томоохон баяр наадамд Монгол Улсын ардын урлагийн төлөөллийг хүндэт зочноор урьсанд зохион байгуулагчдад талархал илэрхийлсэн байна.