Дийлэнхи хүмүүс бага залуудаа хэн нэг хүнийг шүтэн биширч явсан байдаг. Магадгүй тэдгээр нь хамтлаг, дуучин, жүжигчин улс төрч гээд хэн ч байж болно. Ингэхдээ тухайн хүний зураг хөргийг хадгалахаас авахуулаад зүйл бүрээр дуртай, сонирхолтой гэдгээ илэрхийлдэг. Бүр хайрлаж дурласан тохиолдол ч бий. Иймээс ч бид олны танил хүмүүсийн бага залуу насны шүтээнүүдийг сонжихоор шийдсэн юм. Та бүхэн ч гэсэн гэнэн балчир насандаа чухам хэнийг шүтдэг байсан тухайгаа бидэнтэй хуваалцаарай.

“Битлз”-ийн хүүхдүүд. Ерөнхий сайд асан С.Баяр, Сү.Батболд, Э.Бат-Үүл нар бол "Beatles"-ийн үнэнч фэнүүдийн тэргүүн эгнээнд бичигдэх хүмүүс. Тэд тус хамтлагийн хөшөөг төрөлх Дөчин мянгатдаа хүч хавсран байгуулсан юм.

СТА дуучин Б.Амархүү монголынхоо дуучдаас МУГЖ С.Жавхланг шүтэж явдаг бөгөөд түүнтэй хамт дуулахыг мөрөөддөг байжээ. Харин түүний энэ мөрөөдөл нь биелж “Миний нууц хүү” жүжгийн дууг С.Жавхлантай хамтран дуулсан билээ.

Ардчилалын алтан хараацай С.Зориг агсан рок хамтлаг шүтдэг байжээ. Тэрээр Английн алдар Pink floyd хамтлагийн фэн байсан бөгөөд тус хамтлаг дэлхийн хөгжмийн түүхэн дэх хамгийн алдартай хамтлагуудын нэг юм.

Мэргэжлийн сумо бөхийн 68 дахь их аварга Д.Дагвадоржийн хүүхэд ахуй цагийн шүтээн нь Венесуэлийн олон ангит “Халтар царайт” киноны Стерлита юм.  Тодруулбал тэрээр Стерлитад дурлаж байжээ. Тэр ч бүү хэл Тони, Стерлита хоёрыг Монголд ирэхэд нь харах гэж олны дунд зүтгэж яваад “хэтэрхий ойртсон шалтгаанаар” цагдаад бороохойдуулж байсан гэдэг.

Их тэнгэр дэх түрээсийн сууцны асуудлаас болж багагүй бухимдсан “Номин”-гийн Ш.Баярсайхан  Майкл Жексоний үнэнч фэн. Тэрээр бага залуудаа Жексоны бүжгүүдийг эвлэгхэн бүжиглэчихдэг байжээ.

Нэрт хөгжмийн зохиолч Н.Жанцанноровын шүтээн бол Н.Норовбанзад. Тэрээр нэгэнтээ Н.Норовбанзад шиг дуучин Монголд дахин төрөхгүй гэж байв.

СТА жүжигчин А.Мөнгөнзул багадаа “Мандухай сэцэн хатан” киног үзээд Ардын жүжигчин Н.Сувдын фэн болжээ. Түүнийг жүжигчин болоход ч багагүй нөлөө үзүүлсэн гэдэг.

Б.Лхагвасүрэн яруу найрагчдаас Б.Явуухулан шүтдэг. Тэрээр нэгэнтээ багшийнхаа тухай “Б.Явуухулан бол монголын яруу найрагт дэндүү том уянгын тойрог татсан хүн. Монголын үе үеийн яруу найрагчид энэ тойргоос гарч чадахгүй дэнгийн эрвээхэй шиг эргэлдэж байгаа” гэж байв.