“Samsung” компани шинэ бүтээгдэхүүн болох “Galaxy Note 4”-ийг ирэх есдүгээр сарын 3-нд танилцуулахаар болсон билээ. Тус компанийн хамгийн хүчтэй өрсөлдөгч “Apple” компани шинэ загварын iPhone гар утсаа мөн есдүгээр сард танилцуулна хэмээн яригдаж байгаа ч хараахан тов  нь зарлагдаагүй байгаа юм. Тиймээс “Samsung” компани өөрийн хүчтэй өрсөлдөгчөөсөө түрүүлж шинэ бүтээгдэхүүнээ танилцуулах нь тодорхой болоод байна. Ингээд тун удахгүй худалдаанд гарах “Galaxy Note 4”-ийн ид шидээс сонирхуулъя. Ингэхдээ бид “Үндэсний шуудан” сонины тус гар утасны тухай нийтлэлийг ашигласан болно.

Дэлгэц

Юун түрүүнд дэлгэцний хэмжээ сонирхол татна. Анхны Note-ийн хувьд 5.3 инч байсан бол дараагийн хувилбарууд 5.5 болон 5.7 инчийн дэлгэцтэй байсан. Тиймээс логикийн хувьд энэ удаагийнх 5.9 байна гэсэн таамаг байна. Ингэснээр НТС One Max болон LG G Pro 2-ийг гүйцэж, 6.4 инчтэй Sony Xperia Z Ultra-гийн ард л үлдлээ гэсэн үг. Нягтралын хувьд нэлээд өндөр буюу 2560x1440 QHD байх гэнэ. Сүүлийн үеийн “Samsung’"-ийн ухаалагутас, таблетууд Super AMOLED дэлгэцтэй байгаа бол Note 4-ийн хувьд PLS LCD-ийг ашиглах магадлалтай аж. Ингэснээр утасны өртгийг 20 хүртэлх хувиар бууруулах боломжтой юм байна. Гэхдээ мэдээж таамаг учир шинэ Note-ийн хувьд мөн Super AMOLED дэлгэцтэй байхыг үгүйсгэхгүй. Дэлгэцийн хувьд анхаарал татах өер нэгэн өөрчлөлт нь хэлбэр. Ингэхдээ Samsung Round шиг хүнхэр дэлгэцтэй биш, нүүрэн талын гадаргуу тэгш ч хоёр тал нь дугуйрсан мохоо ирмэгтэй түүн дээрээ мөн мэдрэгчтэй, камер, цахим шуудан, мессеж, тохируулга, дуудлага зэрэг түгээмэл хэрэглэгддэг товчлуурууд байрлах юм байна. Ингэснээр хэрэглэхэд илүү хялбар болно гэж үзэж байгаа аж. Мөн уламжлалт, шинэ гэсэн хоёр өөр хувилбартай гэсэн цуурхал явж байгаа юм байна. Уян дэлгэцтэй байх ч магадлалтай аж.

Хүчин чадал

Одоогоор ухаалаг утасны ертөнцөд “Apple” компани л 64 битийн чип ашиглаж байгаа. Тэгвэл хамгийн том өрсөлдөгч нь болох “Samsung” нэгдэхээр шийджээ. Энэ талаартус компанийн маркетингхариуцсан дэд ерөнхийлөгч яриандаа цухалзуулж байсан удаатай. Хэдийгээр Galaxy S5 дээр түүний үг биелээгүй ч Note 4 дээр гарцаагүй гэсэн хүлээлт байна. “SamMobile’’-ын мэдээлснээр Note 4-ийн Европ хувилбар нь шинээр гарч буй Exynos5433 чиптэй, Хойд Америк, Өмнөд Солонгос, Хятад, Японы зах зээлд зориулсан нь Snapdragon 805 процессортой байх аж. RAM-ын хувьд Note 3 нь 3GB байсан бол шинэ загвар 4GB байх гэнэ. График картын хувьд тоглоом тоглоход хамгийн шилдэг нь буюу эхний quad core Snapdragon 805 хувилбар нь Adrendo 420 GPU, хоёр дахь буюу octo-core Exynos 5433 хувилбар нь ARM Mali-T7690 combo байх юм байна.
Камер

“Samsung" компани маш өндөр хүчин чадалтай буюу 20 мегапикселийн мэдрэгчийг хөгжүүлж байгаа бөгөөд оны сүүлийн хагаст багтаан худалдаанд гаргана хэмээн “ЕТ News" мэдээлжээ. Тиймээс шинэ бүтээгдэхүүн 20 мегапикселийн камертай байх өндөр магадлалтай байгаа аж. Note 3-ын хувьд 13, Galaxy S5 нь 16 мегапиксель камертай юм.

Үйлдлийн систем

Шинэ бүтээгдэхүүний үйлдлийн систем нь Android-ын хамгийн сүүлийн үеийн загвар болох Android KitKat хэвээр байх гэнэ. Гэрний хувьд өмнөх хувилбаруудын адил хуванцар байх аж. Харин Galaxy S5- ийн адил тоос шороо, усны хамгаалалттай байх юм байна. Өнгөний сонголтын хувьд хар, цагаанаас гадна сонгодог өнгө нь болоод буй гялтганасан хөх саарал, мөн зэсэрхүү улаан туяатай алтан өнгөтэй гарч магадгүй юм. Утасгүй холбоогоор цэнэглэдэг байх магадлалтай гэсэн цуурхал байгаа ч тийм ч баттай биш.
S Pen

S Pen буюу мэдэрдэг дэлгэцний балны хувьд илүү боловсронгуй болно гэсэн хүлээлттэй байгаа аж. Хамгийн гол нь үзгээ ашиглан хийх гэж буй үйлдлээ дэлгэц дээрээ бичсэнээр гүйцэтгэж болох юм байна. Өөрөөр хэлбэл та үзгээрээ дэлгэц дээрээ “Ээж рүү залга” гэж бичсэнээр утас тань автоматаар таныг командыг гүйцэтгэнэ гэсэн үг.

Утасныхаа түгжээг харцаараа тайлна

Утасныхаа түгжээг хурууны хээгээрээ тайлах нь нэгэн цагт хүршгүй мөрөөдөл байсан бол өнөөдөр хэдийнэ бодит амьдралд нэвтэрсэн. Тэгвэл “Samsung” компани энэ технологийг шинэ төвшинд хүргэхээр ажиллаж байгаа аж. Өөрөөр хэлбэл харцаараа утасныхаа түгжээг нээдэг болно гэсэн үг. Энэ технологи тун удахгүй Note 4 дээр биеллээ олж болзошгүы талаар тус компанийн Exynos процессорын албаны ёсны твиттер хуудаст жиргэсэн байна.
 
Хэт ягаан туяа мэдрэгч

Энэ бол Note 4-ийн бас нэгэн содон онцлог. Та S Health аппликейшнээ нээгээд утсаа нар руу 60 градусын налуулж барьснаар хэт ягаан туяаны хор хэр хэмжээтэй байгааг мэдэж болох юм байна. Хэрэв 0-2-ыг заавал арьсанд маш бага эрсдэлтэй, 3-5 бол хэвийн, 5-7 бол өндөр, 8-10 бол маш өндөр, 11 ба түүнээс дээш бол туйлын их эрсдэлтэй байгааг илэрхийлэх аж.