Яг энэ цагт Төрийн ордон дахь УИХ-ын чуулганы танхим болон Байнгын хороодын хуралдааны танхимд хурууны хээгээр санал хураах төхөөрөмжийг суурилуулж байна. Ингэснээр ирэх намраас гишүүд тус төхөөрөмжөөр саналаа өгдөг болно гэсэн үг. Энэ нь маш олон давуу талтай. УИХ-ын чуулганаар санал хураахад гишүүд нэгнийхээ өмнөөс кнопыг нь дардаг. Мөн ирцээ бүртгүүлчихээд хуралдаа суулгүй хувийн ажлаа амжуулаад явдгийг нь ч хүмүүс мэддэг.  Харин хурууны хээгээр санал өгдөг болбол дээрх хэнэггүй байдлууд бага ч болов арилах юм.  Гэхдээ тус төхөөрөмжүүдийг суурилуулах ажлыг монголчууд бус солонгосчууд хийж байгаа нь твиттер, фэйсбүүкчдийн дургүйцлийг ихээхэн хүргээд байна.
    Учир нь улс орны эрх ашигт нийцсэн чухал шийдвэрүүд болон төрийн нууцтай холбогдсон ажлыг гадныхан гүйцэтгэж байгаа нь олны анхаарлыг ихээхэн татаад байгаа юм. Төрийн нууцтай холбоотой зүйлүүд яригдах үед УИХ-ын чуулган хаалттай хуралддаг. Хаалттай хуралдааны үеэр яригдсан зүйлийг хэн ч гадагш гаргадаггүй. Гэтэл одоо чуулганы хуралдаанаас гарсан шийдвэрүүд гадагш алдагдахгүй гэсэн баталгаагүй боллоо.

Бид гадныханд итгэхээ больсондоо бус чухамдаа улсын нууц, төрийн шийдвэрүүдтэй холбогдсон чухал ажлуудыг монголчуудаараа хийлгэж байвал яасан юм бэ гэснийх. Нөгөөтэйгүүр энэ чиглэлээр үйл ажиллагаа явуулдаг  Монгол компани олон байхад заавал солонгосчуудыг сонгосон нь мөн л анхаарал татаж байна. Засгийн газраас үндэсний компаниудаа дэмжиж ажиллана гэж ярьж буй ч хачир дээрээ тийм биш гэдэг нь үүгээр батлагдаж байна. Ядаж тус ажилд монголчуудаар хяналт тавиулж болох л байсан.