АНУ-ын Элчин сайдын яамны Элчин сайдын Соёлын өвийг хамгаалах сангаас (ЭССӨХС) Дорноговь аймгийн Их Нарт байгалийн нөөц газарт (БНГ) түүх, соёлын дурсгалт өлгийг хадгалан хамгаалах төслийг санхүүжүүлсэн ба энэ нь говийн бүс нутагт энэ төрлийн үйл ажиллагааг анхлан системтэй, тодорхой зохион байгуулалттайгаар явуулж байгаагаараа чухал ач холбогдолтой юм. Төсөл хэрэгжүүлэгч байгууллагаар Денверийн амьтан судлалын сан (ДАСС) ажиллаж, төслийн багийг удирдан чиглүүлж байгаа бөгөөд тэд энэ төслийнхөө хүрээнд Их Нарт БНГ нь Шинэ чулуун зэвсгийн үеэс Монголын Эзэнт гүрнийг үед хамаарах зургаан мянга гаруй жилийн түүхт эд өлгүүдээр баялаг болохыг олж илрүүлсэн байна.

Их Нарт БНГ нь Дорноговь аймгийн баруун хойд хэсэгт 66 мянган га газрыг хамран оршдог бөгөөд 1996 онд хамгаалалтад орсон. Дорноговь аймгийн баруун хойд цөлөрхөг хээрийн энэ нутагт элдэв төрлийн ургамал, хөхтөн амьтан, жигүүртэн шувууд үүрлэн нутагладаг. Монгол улсын түүх соёлын археологийн судалгаануудын хувьд, ихэвчлэн улсын хойд болон баруун хойд нутгуудаар хийгдэж байсан ба Их Нартын бүс нутагт хийгдсэн археологийн судалгаа шинжилгээ, бүртгэгдсэн мэдээ мэдээлэл тун ховор. Мөн төсөл хэрэгжиж эхлэхээс өмнө тус бүсэд соёлын өвийн зохицуулалтын бодлого шаардлагатай эсэх нь ч тодорхойгүй байв.

Энэ зуны турш ДАСС нь Монгол Улсын Шинжлэх ухааны академийн (ШУА) Археологийн хүрээлэн болон Earthwatch институтын сайн дурынхан, Монголын Байгаль хамгаалах холбоо, Анза-Боррегогийн Цөл мужийн парк болон Калифорния дахь Анза-Боррего сангийнханы оролцоо туслалцаатайгаар Их Нарт байгалийн нөөцөд судалгаа шинжилгээ явуулан, 15 шинэ соёлын өвт газрыг нээн илрүүлж, ШУА-ын Археологийн хүрээлэнд бүртгүүлсэн байна. Мөн бүс нутгийн харуул хамгаалалтыг сайжруулахын тулд соёлын өвийн эргүүлийн ажилтанг томилон, шаардагдах тоног хэрэгсэл, сургалт зааварчилгааг өгч, чиг үүргийг нь олгон ажиллуулж эхэлсэн байна. Хүннүгийн үед хамрагдах соёлын өвт газарт нарийвчилсан судалгаа явуулсан ба Их Нарт судалгааны бааз дээр тайлбар тэмдэглэгээг байршуулахаар бэлтгэжээ.

ДАСС нь ШУА-тай олон жилийн түншлэлээр нягт хамтран ажилласаар ирсэн бөгөөд тус байгууллагууд нь байгаль хамгаалалын тулгамдсан асуудлуудыг судалж шийдвэрлэх тал дээр анхааран ажилладаг. Энэхүү онцлог бүхий төсөлд ДАСС, АНУ-ын Калифорния дахь мужийн цэцэрлэгт хүрээлэнгүүд болон Монголын биологичид, ШУА-ын Археологийн хүрээлэнтэй хамтран ажилласан болно.

Элчин сайдын соёлын өвийг хадгалах санг анх 2001 онд хөгжиж буй орнуудын соёлын өвийг хамгаалахад дэмжлэг үзүүлэх зорилгоор байгуулсан ба энэхүү сан нь АНУ-ын гадаад харилцааны салшгүй нэг хэсэг болох дэлхийн соёлын өвийг хамгаалахад анхаарал хандуулсаар ирсэн билээ.