Улаанбаатар хотын 375 жилийн ойг тохиолдуулан ирэх сарын 5-6-нд Монголд анх удаа олон улсын электро хөгжмийн наадам “EAMF- Eco Asia Music Festival”-ыг товложээ. Хоёр өдрийн турш үргэлжлэх дээрх арга хэмжээг Улаанбаатар хотын захиргаа, НҮБ, “Ногоон Ази” ТББ, “Хүннү Трэвл энд Кутур”, “Боловсрол” суваг телевиз дэмжин ажиллаж байгаа гэнэ.

2014 оны сүүлчийн задгай шоу, электро хөгжим сонирхогчдын энэ намрын анхны томоохон цугларалт болох “EAMF- Eco Asia Music Festival”-д Герман, Щвейцарь, Итали, Нидерланд, Швед, Сингапур, Япон, БНСУ зэрэг  дэлхийн олон орны уран бүтээлчид хүрэлцэн ирэх юм. Тухайлбал Францын алдарт Пиэр Аллан Хюберт (ёслолын буудлагын артист Pierre Alian Hubert) хүрэлцэн ирж фестивалын ёслолын буудлагыг удирдан явуулах ба галын наадмын гайхалтай үзүүлбэрээр биднийг гайхашруулж, эко үзэсгэлэн, үнэ төлбөргүй эко зураг зуруулах зэрэг олон үйл явдал хүлээж байна.

“Eco Asia Music Festival”-ын зорилго нь соёл урлагаар дамжуулан хүмүүст байгаль орчноо хайрлан хамгаалахын ач холбогдол, үнэ цэнийг сонирхолтой, хөгжилтэй, энгийн байдлаар ойлгуулахад чиглэжээ.

Фестивалаас олсон орлогын тодорхой хэсэг Монгол Улсын цөлжилтийн эсрэг “Ногоон ой” байгуулах ажилд зориулагдах ба цөлжилтийн улмаас амьжиргаагаа залгуулах боломжгүй болсон айл өрхүүдэд туслах сайн үйлсэд зарцуулагдах юм.