Шинжлэх ухааны доктор, дэд профессор, олон улсын хэмжээний мастер Л.Нямын бичсэн “Дэлхийн улс орнуудын уламжлалт бөхийн барилдааны түүхэн замнал” ном гарлаа.

Бөхийн спорт сонирхогчид, оюутан, эрдэмтэд, тамирчид, дасгалжуулагч-багш нарт зориулсан энэ номонд уламжлалт бөхийн барилдаан буюу үндэсний бөхийн барилдаан нь хүн төрөлхтөний түүх, соёл, угсаатан үндэстний өвийг салшгүй хэсэг байж ирсний хувьд орчин үеийн бөхийн төрлүүдийн төдийгүй хүн төрөлхтөний хөгжлийн үе шат, онцлогийг тодорхойлох үндэс болдгийг гаргажээ.

Энэ номонд арчаик буюу хуучны бөхийн барилдаан, бүс нутгийн бөхийн барилдаан, ихэд дэлгэрсэн бөхийн барилдаан, ардын бөхийн барилдааны үүсэл хөгжил, шашны болон цэргийн утга учир, өвөрмөц онцлогуудыг үзүүлж эртний грекийн “рам” барилдаан, японы самурай нарын “сумо” барилдаан, нүүрээ багаар далдалсан хятадын барилдаан, шведийн глима бөхийн барилдаан, скандинавийн цэргийн бөхийн барилдаан, исландын бөхийн барилдаан, киргизийн куреш барилдаан, солонгосын сурым барилдаан, зүүний бөхийн барилдаан, монгол үндэсний бөхийн барилдааны тухай дэлгэрэнгүй өгүүлж уламжлалт бөхийн барилдааны төрлүүд олон түмний баяр цэнгэлийн хувьд урлагийн бүтээлд хэрхэн дүрслэгдэж ирснийг мөн харуулжээ.

Дэлхийн бүх тив, орон бүрийн уламжлалт бөхийн барилдааны түүхэн хөгжлийг гэрэл зургаар харуулсан нь уншигчдын сонирхлыг татахуйц болжээ.

Доктор Л.Ням нь бөхийн спортын үүсэл, хөгжил, өнөөгийн байдлын талаар цуврал 12 ном гаргахаар төлөвлөн ажиллаж байгаа юм. Энэ бол 7 дахь ном нь ажээ.