ДАШТ-ний гурав дахь өдөр эмэгтэй чөлөөт бөхийн тэмцээн эхэлж 48, 55, 60, 69 кг-ын жингүүдийн барилдаан болно. Өнөөдөр манай 4 бөх дэвжээнд гарна.

-    48 кг-ын жинд 32 барилдаж байгаагаас олон улсын хэмжээний мастер Э.Нарангэрэл нэгдүгээр тойрогт америкийн бөх, ДАШТ-ний хошой хүрэл медальт Алисе Лампетай таарчээ. Түүнийг ялсан тохиолдолд Өмнөд Солонгосын бөх Хью Ёнг Он, францийн бөх Милание Лидия Сандра Лисаффре хоёрын аль ялсантай барилдах магадлалтай.
    Энэ хэсэгт БНАСАУ-ын бөх Хьюн Гьён Ким, японы бөх, ДАШТ-ний алт, мөнгөн медальт, Универсиад наадмын аварга Эри Тосака, беларуссын бөх ДАШТ-ний алт, мөнгөн медальт Ванесса Колодинская, оросын бөх Алиса Морёва нар байгаа бол нөгөө хэсэгт нь азербайжаны бөх, олимпийн болон ДАШТ-ний алт, хошой мөнгөн медальт Мария Стадник, канадын бөх, Универсиад наадмын аварга Жасмина Миан, венесуэлийн бөх, ДАШТ-ний мөнгө, хүрэл медальт Карипо Кастилло, польшийн бөх Ивона Матковская, шведийн бөх Ида Фредерика нар байна.

-    55 кг-ын жинд 19 бөх барилдаж байгаагаас дэлхийн залуучуудын аварга, олон улсын хэмжээний мастер А.Батцэцэг нэгдүгээр тойрогт энэтхэгийн бөх Поожа Дхандатай таарч түүнийг явсан тохиолдолд америкийн бөх ДАШТ-ний мөнгөн медальт Хэлэн Луис Марилиус, бөх Элвирина Юрива Жеманез хоёрын аль ялсантай барилдана. Энэ хэсэгт узбекийн бөх Севера Эшмуратова, японы бөх Хамада нар байна. Нөгөө хэсэгт беларуссын бөх, ДАШТ-ний мөнгөн медальт Залина Сидакова, оросын бөх, ДАШТ-ний хүрэл медальт Ирина Ологонова, канадын бөх Британнее Моргана Лавердюр, хятадын бөх Жиахуа Донг нар байна.

-    60 кг-ын жинд 16 бөх барилдаж байгаагаас дэлхийн залуучуудын аварга, олон улсын хэмжээний мастер С.Цэрэнчимэд нэгдүгээр тойрогт оросын бөх, европийн 5 удаагийн аварга Наталья Гольцтой таарч түүний өвдөг шороодуулбал дараа нь америкийн бөх Женна Росе Буркерт, японы бөх Казуки Саками нарын аль ялсантай барилдана. Энэ хэсэгт хятадын бөх байна Нөгөө хэсэгт нь азербайжаны бөх, олимпийн наадмын мөнгө болон ДАШТ-ний мөнгө, хошой хүрэл медальт Юлия Раткевич, унгарын бөх ДАШТ-ний алт, мөнгө, хүрэл медальт Шастина, канадын бөх Фаззари, шведийн бөх, ДАШТ-ний хүрэл медальт Малин Жоханна Матссон нар байна.

-    69 кг-ын жинд 24 бөх барилдаж байгаагаас ДАШТ-ний хүрэл медальт, олон улсын хэмжээний мастер Б.Одончимэг нэгдүгээр тойрогт латвийн бөх Лаура Скижинатай таарчээ. Түүний ялбал колумбын бөх Лейди Марсела Изкивордо, Өмнөд Солонгосын бөх Ёнсун Жинг хоёрын аль дийлсэнтай хүч үзнэ. Энэ хэсэгт германы бөх Алина Фокен, казахстаны бөх Эльмира Сыздыкова нар байна. Нөгөө хэсэгт нь азербайжаны бөх Надя Семёнцова, америкийн бөх, олимпийн мөнгөн медальт Ренди Миллер, оросын бөх, олимпийн аварга Наталья Воробьёва, хятадын бөх Фэнг Зхоу, японы бөх, ДАШТ-ний хүрэл медальт, Универсиад наадмын аварга Сара Дошо, молдавын бөх Светлана Саенко, шведийн бөх Эвэ Мария Франссон нар байна.