Узбек улсын нийслэл Ташкент хотын “Гимнастикийн ордон”-д үргэлжилж байгаа сонгомол барилдаан, эрэгтэй эмэгтэй чөлөөт бөхийн насанд хүрэгчдийн ДАШТ-ний тав дахь өдөр эмэгтэй 63 кг-ын жингийн барилдаан болно.
    Энэ жинд олимпийн наадмын хүрэл, ДАШТ-ний алт, хүрэл медальт, Универсиад наадмын аварга, Гавьяат тамирчин С.Батцэцэг дэвжээнд гарна.
    Нэгдүгээр тойрогт тэрбээр Японы бөх Рио Ватаритэй таарч түүнийг ялбал Америкийн бөх ДАШТ-ний алт, мөнгө, хүрэл медальт Елена Сергей Пирожкова, латвийн бөх, европийн хошой аварга Анастасия Григорьева хоёрын аль ялсантай нь барилдана.
С.Батцэцэг өнгөрсөн жил Баку хотод болсон “Голден Гран-При” тэмцээнд нэгдүгээр тойрогт японы бөх Рио Ватаритай таарч 4:8 онооны харьцаагаар ялагдаж байсан. Харин Америкийн бөх Е.Пирожковаг ноднингийн ДАШТ-нд цэвэр ялж байсан, Латвийн бөхийг олимпийн наадам гээд тааралдсан тэмцээн бүртээ хожиж байсан.

Энэ хэсэгт Беларуссын бөх Мария Мамащук, Канадын бөх, дэлхийн залуучуудын аварга Даниель Сюзанна Лаппаже нар байна. Нөгөө хэсэгт нь Аербайжаны бөх Рагнетта Гурбанзаде, Польшийн бөх, ДАШТ-ний хошой хүрэл медальт Моника Эвэ Михалик, Шведийн бөх, ДАШТ-ний хүрэл медальт Хэнна Катерина Жоханссон, Украиний бөх Юлия Ткач нар орсон байна.