Гамшгийн эрсдэлийг бууруулах дэд хөтөлбөрийн хүрээнд Баянгол дүүргийн Онцгой байдлын хэлтсээс “Өсвөрийн аврагч” тэмцээнийг Аврах тусгай ангийн сургалтын төвд  10 дугаар сарын 17-ны өдөр зохион байгууллаа.

Уг арга хэмжээнд нээлтэд Баянгол дүүргийн Засаг даргын орлогч П.Цэцэгмаа, дүүргийн Онцгой байдлын хэлтсийн дарга Р.Дадам нар болон албаны холбогдох хүмүүс оролцов.
Ерөнхий боловсролын дунд сургуулийн сурагчдыг гамшгаас хамгаалах, аврах ажиллагааны анхан шатны мэдлэг олгох, болзошгүй ослын үед өөртөө болон бусдад эмнэлгийн тусламж үзүүлэх, Онцгой байдлын албаны үйл ажиллагааг сурталчилах зорилготой уг тэмцээнд Баянгол дүүргийн Ерөнхий боловсролын 17 сургуулийн 133 багш, сурагчид оролцсон юм.

Тэмцээнд оролцож буй сурагчид үндсэн зургаан төрлөөр хурд хүч, авхаалж самбаа, оюун ухаанаа сорисоноос гадна бэлтгэж өгсөн хүнсээр өөрсдөө хээрийн хоол хийж нэгэн өдрийг үр бүтээлтэй, дурсамж дүүрэн өнгөрүүллээ.

Мөн тэргүүлэгч болон идэвхтэй сайн оролцогч байгууллага, сурагчдыг Онцгой байдлын албаны идэвхтэн, сайн дурынханы гишүүнчлэлд бүртгэж авсан бөгөөд тэмцээнд 113 дугаар сургууль I байр, II байрт 38 дугаар сургууль, III байрт "Эрдмийн өргөө" сургууль тус тус шалгарч өргөмжлөл, медаль, шилжин явах цомын эзэд боллоо.

Дашрамд дуулгахад “Өсвөрийн Аврагч” тэмцээнийг жил бүр Боловсролын хэлтэстэй хамтран уламжлал болгон зохион байгуулах юм байна.