Өчигдөр Каннед болсон “MIPCOM” телевизийн фестивалаас “Оны шилдэг хүн” шагналыг продюсер Саймон Ковелл хүртжээ. “Got Talent” шоуг анх 2005 онд санаачилж, 67 оронд амжилттай хэрэгжүүлсэн нь түүнийг дээрх шагналыг хүртэхэд чухал нөлөө үзүүлсэн байна. Саймон Ковелл шагнал гардуулах ёслолын үеэр 4000 гаруй төлөөлөгчдийн өмнө сонирхолтой ярилцлага өгсөн бөгөөд энд манай улсад нэвтрүүлгээ зарах тухай асуудал хөндөгджээ.

Телевизийн сэтгүүлч түүнээс “Та “Got Talent” шоугаа 67 оронд худалджээ. Далайн орнуудад ихэнхидээ худалдаагүй юм байна. Харин далайд гарцгүй Монгол улсад яагаад зараагүй юм бэ?” гэх асуухад тэрээр “Би энэ талаар өмнө нь бодож үзээгүй юм байна. Улс орны үндэстэн бүр авьяастай байдаг. Тиймээс Монголд нэвтрүүлгээ зарж, эхлэх тухай судлах болно” хэмээн хариулсан байна.
Дашрамд дурдахад “Got Talent” шоу нь олон улсад хамгийн ихээр дэлгэрсэн энтертайнмент нэвтрүүлэгт тооцогддог аж.