ЦЕГ-аас улсын хэмжээнд галт зэвсгийн тооллого явагдаж байгаатай холбогдуулан дөнгөж сая мэдээлэл хийлээ.

Жил бүрийн дөрөвдүгээр улиралд орон даяар галт зэвсгийн тооллого явуулдаг. Уг арга хэмжээ өнгөрөгч сарын 31-ний өдөр эхэлсэн байна. Ирэх 12 дугаар сарын 4-ний өдрийг дуустал үргэлжлэх аж. Иймд иргэн, хуулийн этгээд товлосон хугацаанд цагдаагийн байгууллагад ирж, галт зэвсгээ тоолуулах, бүртгэлгүй буугаа бүртгүүлэх хэрэгтэй гэдгийг цагдаагийн газраас анхааруулж байна. 

Галт зэвсгээр үйлдэгдсэн хэргийн талаар ЦЕГ-ын хэвлэл мэдээллийн төвийн ахлах, цагдаагийн ахмад Ё.Лхагвасүрэнгээс тодруулахад “Энэ онд галт зэвсгээр үйлдэгдсэн хэрэг 22 бүртгэгдсэнээс бүртгүүлээгүй зэвсгээр гэмт хэрэг үйлдсэн 4 хэрэг гарсан. Тодруулбал, хүний амь нас хохироосон хэрэг нэг, гэмтсэн хүн 5, хууль бусаар авч явсан гэдэг үндэслэлээр цагдаагийн байгууллагад хураагдан шалгагдаж байгаа хоёр, дээрэмдэх төрлийн гэмт хэрэг 1, танхайрах төрлийн гэмт хэрэг 2, мал хулгайлахдаа ашигласан нэг, хууль бус ан хийсэн хоёр хэрэг бүртгэгдсэн” гэв.

Дашрамд хэлэхэд, галт зэвсгээр хүний амь нас хохирсон хэрэг энэ сарын 4-нд Архангай аймгийн Их тамир суманд 10.00 цагийн үед бүртгэгдсэн байна. “Өөрийгөө буудсан хүн байна” гэсэн мэдээллээр шалгалтын ажиллагаа хийсэн байна. Уг хэрэг нь Архангай аймгийн Их тамир сумын Хуурай гэх газар үйлдэгдсэн байгаа. Иргэн Ч гэгч нь 30 настай бөгөөд өөрийн хэрэглэдэг “Тигер” маркийн галт зэвсгээр оролдож байгаад сум алдаж өөрийнхөө амь насыг хохироосон хэрэг үйлдэгдсэн байна. Одоогоор шалгалтын ажиллагаа хийгдэж байна.

Мөн 2014 онд Хөвсгөл аймгийн Жаргалант сумын төвд иргэн Ж гэгч нь согтуугаар агсам тавьсан гэсэн мэдээллээр шалгалтын ажиллагаа хийхэд тухайн Ж гэгч нь дөрвөн хүнийг буудаж, хоёр хүний амь насыг хохироосон байдаг. Улмаар өөрийнхөө амь насыг буудаж хохироосон хэргийг Хөвсгөл аймгийн цагдаагийн хэлтсээс шалгаад эрүүгийн хэрэг үүсгэн шүүхэр шийдвэрлүүлсэн.