Оросын ерөнхийлөгч Владимир Путин, Хятадын удирдагч Си Зиньпин нар байгалийн хийн нийлүүлэлтийн асуудлаар ойлголцлын санамж бичигт гарын үсэг зуржээ. Энэхүү гэрээг байгуулсанаар Оросын байгалийн хийн хамгийн том хэрэглэгч нь Хятад улс болж байна. Орос улс Хятад руу жил бүр 30 тэрбум куб метр байгалийн хий нийлүүлэхээр Алтайн чиглэлд хоолой барихаар төлөвлөсөн билээ. Өнгөрсөн тавдугаар сард 400 тэрбум долларын гэрээ байгуулсанаар хийн хоолой тавих ажил аль хэдийнэ эхэлжээ.

“Бид энэ төслийн техник эдийн засгийн үндэслэлийг хүлээн зөвшөөрч, эцсийн тохиролцоонд хүрлээ” хэмээн В.Путин ярьжээ. Хоёр орны удирдагчид мөн Оросын Газпром, Хятадын төрийн өмчит CNOOC компаниудын хамтын ажиллагааны гэрээг үзэглэсэн байна. Тэд энэ онд нийт таван удаа уулзахдаа валют солилцоо, цэргийн хамтын ажиллагааны гэрээг баталсан гэж Оросын ерөнхийлөгчийн төлөөлөгч Дмитрий Песков ярьжээ.