Польшийн Тусгаар тогтнолын өдрийг тэмдэглэх үеэр буюу энэ сарын 11-нд хэт үндсэрхэг үзэлтнүүд гудамжинд жагсаж, цагдаагийн ажилтнууд руу чулуу шиджээ. Цагдаа нар үүний хариуд усан буугаар шүршиж, мөргөлдөөн үүссэн байна. Энэ үеэр 50 орчим хүн гэмтэж бэртэн 276 хүнийг хоморголон баривчилсан ажээ.

    Варшав хотноо болсон эсэргүүцлийн жагсаалд “Радикал хотхон, “Польшийн залуус” хэмээх холбоонуудын гишүүд оролцсон байна. Иймэрхүү жагсаал 2008 оноос хойш уламжлал болгон зохион байгуулагдаж байгаа бөгөөд жил бүр үймээн самуунаар дуусдаг гэнэ. 2013 оны жагсаалыг тараахын тулд резинэн буу, халуун чинжүү ашиглаж байжээ.

     Тэмцэгчид Оросыг эсэргүүцсэн уриа лоозон барьж, Дэлхийн хоёрдугаар дайны хүчирхийлэл, Зөвлөлтийн үеийн эзлэн түрэмгийллийг нь буруушаадаг юм. Харин Польшийн гадаад хэргийн яам энэ үйлдлийг “зөвтгөх ямар ч шалтаангүй танхай балмад хэрэг” гэж шүүмжилдэг ажээ.
Польш улс 1918 оны арваннэгдүгээр сарын 11-нд Орос, Прусс, Хабсбургийн эзэнт гүрний булаан эзлэлтээс салсанаар тусгаар тогтносон байна.