Швейцарийн Цюрих хотноо болсон ФИФА-гийн ээлжит хуралдаанаар Дэлхийн шилдэг хөлбөмбөгчний шагнал буюу Ballon d"Or-ийн эцсийн шатанд шалгарч үлдсэн гурван хөлбөмбөгчний нэрийг зарлалаа. 2015 оны Дэлхийн шилдэг хөлбөмбөгчинд Португалын шигшээ багийн ахлагч, Реал Мадрид клубын супер довтлогч Криштиану Роналду, Аргентины шигшээ багийн ахлагч, Бареслона клубын довтлогч Лиональ Месси болон Германы шигшээ, Байерн Мюнхен клубын нэг номерын хаалгач Мануэль Нойер нар өрсөлдөхөөр тунаж үлджээ. Энэ жил дээрх гурван тоглогчийн хэн нь ч авах магадлалтай. Энэ тухай ФИФА-гийн Ерөнхийлөгч Жозеф Блаттер хүртэл өөрийн биеэр илэрхийлсэн байгаа. Гэхдээ хөлбөмбөгт үнэлэлт дүгнэлт өгдөг алдартай экспертүүдийн хэлж буйгаар энэ жилийн гол өрсөлдөөн нь Криштиану Роналду болон Лиональ Месси нарын хооронд өрнөх гэнэ. Учир нь дээрх хоёр тамирчин өнгөрсөн улиралд үнэхээр гайхалтай байсан. Шигшээ баг болон клубын төвшинд маш амжилттай тоглосон юм. Мөн эвдэгдэх боломжгүй гэж байсан олон рекорд амжилтуудыг шинэчлэн тогтоогоод байна. Магадгүй тэднийг энэ цагийн “Мөнхийн өрсөлдөгчид” гэж нэрлэх нь зөв байх. Харин Герман хаалгач Мануэль Нойерын хувьд бага зэрэг сул өрсөлдөгч байх талтай.
                Шагналын эзэн хэн байх вэ? гэдэг зүйл дэлхий даяарх олон мянган хөлбөмбөг сонирхогчдын ярианы хамгийн гол сэдэв болж байна. Үүнтэй холбоотойгоор үргэлж хэвлэл мэдээллийн хэрэгслээр хоорондоо харьцуулагдаж байдаг Криштиану Роналду, Лиональ Месси нарын үнэнч хөгжөөн дэмжигчид жинхэнэ утгаараа “алалцаж” байна. Сонирхуулахад манай оронд ч гэсэн Барса болон Реалын фэнүүд Фэйсбүүк, Твиттер, Инстаграмм зэрэг сошиал ертөнцөөр хооронд нь талцалж эхэллээ. Бүр хэрүүл, зодоон дээрээ ч тулахад бэлэн байгаа бололтой. Бие биенээ элдэвээр хэлцгээж байна.
Лиональ Месси хэрвээ энэ шагналыг хүртвэл тав дахь удаагаа Дэлхийн шилдэг хөлбөмбөгчин болно. Тэрээр өмнө нь гурван жил дараалан дэлхийн шилдэгээр тодорч рекорд тогтоосон. Энэ жил Ballon d"Or хүртвэл бас л нэг шинэ амжилтын эзэн болно. Уг шагналыг урд нь таван удаа хүртэж байсан нэг ч тоглогч байхгүй. Харин Криштиану Роналду энэ шагналыг гурав дахь удаагаа хүртэнэ. Мөн хоёр дахь жилдээ дараалан Ballon d"Or-ийн эзэн болох учиртай. Ихэнхи хөгжөөн дэмжигчид болон европын томоохон лигийн ТОП багуудын дасгалжуулагчид Криштиану Роналдуг Ballon d"Or-ийг авна гэсэн таамаг дэвшүүлжээ. Эцэст нь Герман хаалгач Мануэль Нойер дэлхийн шилдэг тоглогч болвол уг шагналыг анх удаагаа гардан авна. Түүхэнд өмнө нь Орос хаалгач Лев Яшинаас өөр нэг ч хаалгач дэлхийн шилдэгээр тодорч байгаагүй юм. Мануэль Нойер хэрвээ ялагчаар шалгарвал Ballon d"Or авсан түүхэн дэхь хоёр дахь хаалгач болох ёстой. Дэлхийн шилдэгийг уламжлал ёсоор 2015 оны нэгдүгээр сарын 12-нд Швейцарийн Цюрих хотны тодруулна. Ингээд дээрх гурван хөлбөмбөгчний өнгөрсөн улиралд гаргасан амжилтыг товчоор танилцуулъя.

Криштиану Роналду: Түүний хувьд өнгөрсөн улирал карьерынх нь хамгийн шилдэг улирлуудын нэг байсан юм. Криштиану Роналду өнгөрсөн жил нийт Реал Мадридын нэрийн өмнөөс 55 тоглолтод оролцож, 55 гоол оруулжээ. Энэ нь тоглолт бүрт гоолдож байсан гэсэн үг юм. Гоол оруулахад чухал үүрэг гүйцэтгэж оновчтой өгсөн дамжуулалт нь 19 байна. Аваргуудын лиг, УЕФА-ын Супер цом, Испанийн Эзэн хааны цомын тэмцээн зэрэг томоохон гурван тэмцээнд багийн хамтаар аварга болсон. Хүртсэн шагналуудын хувьд Европын шилдэг хөлбөмбөгчин, Ла лигийн шилдэг мэргэн бууч, Европын шилдэг мэргэн бууч, Ла лигийн шилдэг тоглогч, шилдэг довтлох чиглэлийн хагас хамгаалагч, Алберто ДиСтефаногийн нэрэмжит шагнал, Нэг улиралд 50-иас дээш гоол оруулсан анхны тоглогч гэх зэрэг нэр хүнд бүхий олон шагналуудыг өөрийн болгосон. Мөн түүний шинэчлэн тогтоосон рекорд амжилтууд гэвэл 2014 онд хамгийн олон гоол оруулсан тамирчин, Реал Мадрид клубын түүхэн дэх хамгийн олон гоол оруулсан дөрвөн тамирчны нэг, Аваргуудын лигийн нэг улиралд хамгийн олон гоол оруулсан тамирчин гэх мэт олон рекорд амжилтуудыг тогтоожээ. Энэ бүх амжилтыг нь харгалзан үзэж Роналдуг гурав дахь Ballon d"Or-ийг хүртэх ёстой гэж олон спорт сонирхогчид үзэж байна.

Лиональ Месси: Энэ цаг үед Ballon d"Or-ийг дөрвөн удаа хүртээд буй хөлбөмбөгчин Мессигээс өөр энэ нэг ч алга. Тэрээр энэ удаа дэлхийн шилдэгээр шалгарвал түүхэнд ганцаараа нэрээ мөнхлөх гайхалтай мөч тохиох учиртай. Лиональ Месси өнгөрсөн жил нийт 62 тоглолтод оролцож, 52 гоол, 21 оновчтой дамжуулалт өгчээ. Харамсалтай нь тэрээр өнгөрсөн жил ямар нэгэн цомын эзэн болоогүй нам гүмхэн улиралыг өнгөрөөжээ. Гэвч хөлбөмбөг бол багийн спорт гэдгийг санах хэрэгтэй. Багаараа гаргасан амжилт нь гавихгүй ч гэсэн хувь тоглогчийн амжилт гэж бий. Л.Месси ч өөрийн үүргээ гүйцэтгэж Криштиану Роналдутай өрсөлдөхүйц хэмжээний хувийн тоглолт үзүүлснийг дээр дурдсан статистик үзүүлэлтээс харж болно. Гаргасан амжилт гэвэл ДАШТ-ын мөрөөдлийн шигшээд нэрлэгдсэн, Европын шилдэг мэргэн буучдын жагсаалтын дэд байранд орсон юм. Энэ улиралд Аваргуудын лигийн бүх цаг үеийн хамгийн гоол оруулсан тамирчингаар тодорлоо. Хувийн болон багийн амжилтаараа Криштиану Роналдутай арай л эн зэрэгцэж чадахгүй нь харагдаж байгаа байх. Гэхдээ зарим хүмүүс ФИФА-г Латин Америкичуудад илүүтэй боломж олгодог. Тийм учраас Л.Месси энэ жил өрсөлдөөнд хүчтэй оролцох болно гэж байр сууриа илэрхийлсэн юм.

Мануэль Нойер: Герман хаалгач Мануэль Нойер Ballon d"Or-ийг хүртвэл хаалгачийн хувиар дэлхийн шилдэг болсон хоёр дахь тохиолдол болох учиртай. Мануэль Нойерын хувьд 2013/2014 он үнэхээр сайн улирал болж өнгөрсөн. Тэрээр 2014 оны Дэлхийн аварга, Бундеслигийн аварга, Германы цомын тэмцээний аварга зэрэг томоохон тэмцээнүүдийн цомыг хүртсэн. Хувийн шагналын хувьд Германы өнгөрсөн улиралын шилдэг хөлбөмбөгчин, ДАШТ-ийн шилдэг хаалгач болжээ. Ерөнхийдөө германчуудыг дэлхийн аварга болоход үнэтэй хувь нэмэр оруулж, хаалгаа найдвартай манаж байсан ирээдүйтэй шилдэг хаалгач юм.