Азийн соёлыг дэлхий дахинд түгээн дэлгэрүүлсэн Европын нэрт аялагч Марко Пологийн тухай 10 ангит цуврал киног “The Weinstein” хэмээх Америкийн кино компани бүтээж, үзэгчдийн хүртээл болгосон билээ. 90 сая долларын өртгөөр бүтэж буй уг киноны зураг авалтыг Итали, Казакстан, Малайзад хийжээ. “Монгол эмэгтэйчүүд бүгд морин дэл дээр төрдөг” гэж Марко Поло тэмдэглэсэн байдаг. 
    Тиймээс энэхүү кинонд Монголын Хубилай хаан, түүний дайчин хөвгүүдийг баатруудын дүрээр харуулдаг юм. Тэр утгаараа Монголчуудын түүх соёлыг дэлхийд сурталчлах гэнэ. Ингээд киноны уран бүтээлчдийн танилцуулгын хүргэж байна.

24 настай Италийн жүжигчин Лоренцо Ричельмий Марко Поло киноны гол дүрийг бүтээжээ. Найман настайгаасаа кинонд тоглосон тэрээр цуврал бүтээлүүдээрээ олны танил болсон юм. 2011 онд "Shooting empty" хэмээх богино хэмжээний киногоороо Италийн шилдэг эрэгтэй жүжигчний шагнал хүртжээ. Тэрбээр англи хэл мэдэхгүй учраас “Марко Поло” кинонд гол дүр бүтээхэд багагүй бэрхшээл гарсан гэдгийг хүлээн зөвшөөрчээ.

Хятад гаралтай Америкийн жүжигчин Жон Чен нь 1979 онд Little Flower киногоороо олон улсын анхаарлын төвд орж, 1987 онд Оскарын шагналт “Сүүлчийн эзэн хаан” кинонд дүрээ мөнхөлжээ. Мөн Twin Peaks, Red Rose, White Rose, Saving Face киногоор нь үзэгчид түүнийг сайн мэднэ. Жоэ Чен Шанхайн болон Азийн кино наадмуудаас шилдэг эмэгтэй жүжигчний шагналыг хүртжээ. Тэрбээр Марк Полод хааны хатан Чабигийн дүрд тогложээ.

Америкийн жүжигчин, продюсер, тулааны урлагийн мастер Рик Юн Солонгос гаралтай нэгэн юм. Рик Юн анх 1999 онд Япон-Америкийн дайны баатар Каузо Мияамотогийн дүрд тоглож байлаа. Мөн “Галзуу хурд” кинонд Пол Уолкертой хамтран тоглож байсан. 2002 онд People сэтгүүл түүнийг хамгийн секси эрчүүдийн нэгээр нэрлэжээ.

Хятадын дуучин, жүжигчин, хөтлөгч Жу Жу Shanghai Calling, Secret Sharer, Cloud Atlas кинонд тоглож алдаршчээ. Тэрбээр Марко Пологийн хайрыг татсан нууцлаг гүнжийн дүрд тоглосон байна. Алс хол нутагт бэр болох гүнж Марко Полод дурласнаар үйл явдал ээдрээтэй болно.

Египетийн кино од Амр Вакед нь Ойрхи Дорнодын нүүр царай болсон жүжигчин юм. 2005 онд Холливудын "Syriana" кинонд тоглож олон улсын танил болсон Амр Вакед нь Египет, Дубайн кино наадмаас шилдэг эрэгтэй жүжигчний шагнал хүртжээ. Тэрбээр Марко Поло цувралд Хубилай хааны улс төрийн зөвлөхийн дүрд тоглосноороо бахархаж байна хэмээн ярьжээ.

Хятад гаралтай Британийн жүжигчин Том Ву Revolver, Shanghai Knights, Batman Begins кинонуудад тулааны урлагийн чадвараа гайхуулсан юм. Түүнийг карате, вин чун, хун гагийн нэрт мастер гэж хэлж болно. 1988 онд Том Ву Хятадын тулааны урлагийн тэмцээнд оролцож, хоёр хүрэл, нэг алтан медаль авчээ. Тэр 1995 онд Британийн “Yellow Earth” театрыг үүсгэн байгуулагчдын нэг юм.