Шинэ жилийн баяраар хамгийн завгүй байдаг хүмүүсийн нэг бол яахын аргагүй урлаг соёлынхон. Албан байгууллага, айлчин гийчинд баяр хүргэж, тэдэнтэй шинэ жилийн баярыг нь хуваалцах эрхэм үүргийг тэд хүлээдэг.

Тэгвэл тэд энэ жил хаана, хэрхэн баярлах вэ?

МУГЖ,  дуучин Б.Сарантуяа: Шинэ оноо гэртээ гаргах нь ээ
Тэрбээр шинэ жилийн баярыг гэр бүлийн баяр гэдэг. Ялангуяа эцэг эхчүүдийн хувьд хүүхдүүдээ баярлуулах тэднийхээ хүслийг биелүүлэх чухал өдөр гэж тэрбээр боддог байна. Тиймээс дуучин маань энэ өдрийг гэр бүлийнхэнтэйгээ, халуун ам бүлээрээ баярын ширээний ард сууж өнгөрөөх нь ээ.

Дуучин А.Хаянхярваа: Энэ жил заавал гэр бүлдээ зав гаргана
Түүний хувьд хамгийн түрүүнд хүүхдүүдийнхээ хүслийг биелүүлэх юм байна.   Урлагийн хүн учир тоглолт, урилга хүлээн авалт гээд хүүхдүүдийнхээ хүслийг тэр бүр биелүүлж чаддаггүй аж. Харин энэ жил заавал гэр бүлийнхэндээ цаг гаргахаар шийджээ. Харин дараа нь дотны найз нөхдийнхөө хүрээнд тэмдэглэх төлөвлөгөөтэй байгаа гэнэ.

“Гурван охин” хамтлагийн Г.Анхмаа: Чингисийн талбайд шинэ оноо гаргахаар төлөвлөжээ
Гурван охиныхны хувьд өнөөдрийн шоу тоглолтонд оролцох юм байна. Харин маргааш ч Чингисийн талбайд хуран цугласан олон түмэнтэйгээ баярлан хөөрч шинэ оноо гаргах магадгүй байгаа аж.

Бултаараа хилийн чанадад он гаргах одод
Монголын урлагийн одод шинэ жилийн баярыг хилийн чанадад нутаг нэгтнүүдтэйгээ угтдаг явдал олон. Тэгвэл тэд бүр бултаараа нийлж нэгдэж шинэ жилээр гадагшаа явдаг болсон байна. Тухайлбал, “Харанга” хамтлаг, реппер Gee, дуучин Б.Баярцэцэг, Г.Эрдэнэтунгалаг, жүжигчин Ж.Булган-Эрдэнэ, Э.Ууганбаяр нар нэгдэн баг болж АНУ-ын таван хотод тоглолт хийж байгаа юм байна.

Ая зохиогч Н.Халиун: Уламжалал ёсоор гэрийнхэнтэйгээ, халуун бүлээрээ шинэ он гаргана.

Дуучин Ч.Цэлмүүн: Гэртээ нөхөр, хүүхэдтэйгээ шинэ оноо угтана. Маргааш ширээгээ засахад бэлтгээд эхэлнэ дээ.

Гавьяат жүжигчин Ц.Төмөрбаатар: Бусад хүмүүсийн л адил гэртээ, гэр бүлийнхэнтэйгээ баяраа тэмдэглэнэ.