Чи түүнд “Салъя” гэж хэлдэг ч нэг мэдэхэд буцаад л гарт нь тэврүүлчихсэн хэвтэж байдаг. Чамайг хангалттай их өвтгөсөн энэ харилцааг дуусгаж чадахгүй байгаа шалтгаанаа чи “Цаг нь болоогүй” гэж тодорхойлсоор. Гэхдээ яг үнэндээ цаг нь болчихсон ч юм билүү? Доорх 5 шинжийг хайж үзээрэй.


Чи салах илүү ноцтой шалтгааныг хайсаар байгаа
Түүнтэй хамт байхад ихэвчлэн сэтгэл тавгүй, сул дорой мэдрэмж төрдөг бол энэ муугийн дохио. Дотроос тогтмол чангаагаад байгаа зөн совингоо дутуу үнэлэх хэрэггүй. Бид ихэвчлэн урам хугарсан жижиг шалтгаануудаа хайр сэтгэлээрээ дарангуйлж үл тоомсорлочихоод, илүү том, илэрхий баримтыг хайж хугацаа алдсаар байдаг. Хэд, хэдэн удаа гар далайхад нь хэчнээн их айсан ч “Ямар яг гар хүрчихсэн биш дээ” гэж өөрийгөө тайвшруулна. Олон бүсгүйтэй дотно мессеж бичилцдэг гэдгийг нь мэдсэн ч “Тэдэнтэй унтаж хэвтсэн бол өөр хэрэг” гээд уучилж өнгөрүүлнэ. “Буруу” гэж дотроос хатгаад байхад л чи харилцаагаа таслах илүү баттай, ноцтой шалтгаан гарч ирэхийг хүлээн эргэн очсоор байгаа бол одоо үнэхээр дуусгах цаг нь болжээ.

Чи түүнийг “сурган хүмүүжүүлж” байгаа
Эмэгтэйчүүд бидэнд байдаг нэг том асуудал бол эрчүүдийг сайжруулж, сургаж чадна гэж найддагт оршино. Жинхэнэ эр хүнд өөртэйгөө яаж харьцахыг зааж, бэлтгэх шаардлагагүй байдаг. Түүнийг сайжруулахдаа хамаг анхаарлаа төвлөрүүлсээр бид харилцааны илүү чухал хэсгүүдийг анхаарлаасаа холдуулж, ямар хортой гол руу нүдээ даран шумбах гэж байгаагаа ухаардаггүй.

Түүнийг өөрчлөгдөнө гэж найдсаар байгаа
Түүнийг алдаа гаргах болгонд нэг нартай өдөр л өөрчлөгдчихнө гэж итгэсээр тэсэх нь цаашдын харилцаанд аюултай. Учир нь бид тэр “нартай өдөр”-ийг нь хүлээх явцдаа түүний муу үг үйлдэлд нь дасан зохицоход өөрсдийгөө сургаж байдаг. Өдөр ирэх тусам түүнд тавих шаардлагаа, өөрийнхөө үнэ цэнэтэй хамт бууруулдаг гэсэн үг юм. Хамгийн муухай нь нэгэнтээ ийм байдалд орж байсан бүсгүй энэ залуугаас салсан ч дараагийн удаад бүр ч долоон дор эртэй учирчих нь бий.

Та хоёр яг нэг л шалтгаанаас болж байнга салдаг
Байнгын салалтынхаа шалтгааныг тодорхойлж, анализ хийгээд үзээрэй. Мөн байнгын эвлэрлийнхээ шалтгааныг ч тодорхойл. Хэрвээ тэр шалтгаанууд арилашгүй бол та хоёрын харилцаа ч бас бүтэшгүй гэсэн үг.

Чи түүнийг алдахаасаа айсандаа өдөр бүр уучилж байгаа
Бидний салж нийлдэг харилцаандаа зориг гарган цэг тавьж чаддаггүй нэг шалтгаан бол түүнийг алдахаас айх. Өөр хүнтэй хамт байгааг нь харж чадахгүй, өнгөрүүлсэн цаг хугацаа хэтэрхий хайран байна, гэр бүлийнхэн, найз нөхөдтэй нь хүртэл дотносчихсон юм чинь яаж салах вэ дээ зэрэг олон ач холбогдолгүй шалтгааныг гаргаж ирэн, өөрөө өөрийгөө хавхалдаг. Харамсалтай нь эдгээр шалтгаан бүгд бидний зүрх сэтгэлээс илүү чухал байж чаддаггүй. Айдсаа л давчихвал тавьж явуулах хүч чадал хангалттай байгааг чи мэдрэх болно.