Холливудын нэрт жүжигчин Стивен Сигал хэдэн жилийн турш 13-р зууны Монголын удирдагч Чингис хааны намтарчилсан бүтээл хийхээр ивээн тэтгэгчид хайж байгаа ажээ. Тэрээр саяхан Орост айлчлахдаа энэ тухайгаа ярьжээ. Сигал 2011 онд Казакстаны Астанад болсон хэвлэлийн бага хурлын үеэр Чингис хааны дүрд тоглох хүсэлтэй гэдгээ илэрхийлж байсан удаатай. 

    “Би Чингис хааны тухай кино хиймээр байна. Надад олон санал ирдэг ч гэсэн зүгээр нэг кино биш, томоохон хэмжээний туульс бүтээмээр байна. Магадгүй надад энэ тал дээр туслах хүн гарч ирэх байх” хэмээн Сигал ярьжээ. Сигал Америкийн кинонуудыг хэтэрхий уйтгартай хэмээн шүүмжилсэн юм. Түүнийг Б.Эрдэнэтуяа гэдэг Монгол бүсгүйтэй ханилсныг уншигчид мэдэх биз ээ.