“Yahoo news”-т гарсан Монголын эдийн засгийн нийтлэлийг орчуулан хүргэж байна.
           Монголын Засгийн газрын 10 сая ам.долларын бондыг авах үнийн санал ирээгүй учраас худалдааг хаасан нь эдийн засаг хүндэрч, тэмцэлдэж эхэлсэний шинэхэн дохио боллоо. Ингэснээр 20 тэрбум төгрөг буюу 10,2 сая ам.долларын бонд зарагдаагүй үлдсэн гэж Төв Банкны вэб сайтад бичжээ.
          Орос-Хятадын дунд хавчуулагдсан, далайд гарцгүй энэ улсын Засгийн газар сүүлийн жилүүдэд ашиглагдаагүй үлдсэн 1,3 триллион долларын өртөг бүхий байгалийн баялгийг ирээдүйн хөгжилд чиглэгдсэн байхаар төрийн бодлогоо боловсруулсаар ирсэн юм. Энэхүү сунжирсан тэмцэл нь эдийн засгийн давалгааг бий болгож байна. Үүнийг тогтолцооны гажуудлын бодит жишээ болсон Төв Банкны бондын дуудлага худалдааны уналтаас харагдана. “Сүүлийн зургаагаас есөн сарын хугацаанд Монгол банкны хэд хэдэн дуудлага худалдаа бүтэлгүйтсэн. Өмнөх дуудлага худалдаа бүрт Засгийн газрын бондын дийлэнх хувийг дотоодын банкиуд төлөөлж байсан. Гэвч  хомсдол нүүрлэж, хадгаламжийн зардал ихэссэнээс болоод  банкны систем дэхь бэлэн мөнгө хумигдаж байна” гэж хөрөнгийн зах зээлийн тэргүүлэгч компани болох “BDSec”-ийн үйл ажиллагаа эрхэлсэн захирал Ник Коузин ярьжээ.
              2011 онд зэс, алтны нөөцтэй Оюу Толгойн ачаар Монголын эдийн засгийн өсөлт 17,5 хувьд хүрч, дэлхийд тэргүүлж байв. Гэвч 2014 онд гадаадын шууд хөрөнгө оруулалт 74 хувиар буурч, төгрөгийн гадаад валюттай харьцах ханш 11 хувиар унажээ. Тиймээс энэ долоо хоногт Ерөнхий сайд Ч.Сайханбилэг Токиод айлчилж, Шинзо Абетэй чөлөөт худалдааны гэрээнд гарын үсэг зураад байна. Монгол-Японы төлөөлөгчид хүлэмжийн гүзээлзгэнэ, сам хорхойн ферм зэрэг хөдөө аж ахуйн салбарт хамтран ажиллахаар судлаж байгаа бөгөөд энэ нь эрдэс баялгаас бусад салбарын хөрөнгө оруулагчдыг татахад нөлөөлнө гэж үзэж байна.