Оюутолгойн төслийг хэрэгжүүлэгч Рио Тинто компани Монголд хэлэлцэгдэж буй саналыг дэмжихгүй байр суурьтай байгаа тухай барууны хэвлэлд мэдээлжээ. Энэ долоо хоногт манай засгийн газар Оюутолгойгоос эзэмшдэг төрийн 34 хувийг роялтигаар солих саналыг парламентаар хэлэлцүүлж ихээхэн шуугиан дэгдээсэн. Тэгвэл Рио Тинто компани 34 хувийг сольж авах огтхон ч сонирхолгүй байна хэмээн мэдээллээ. Энэ тухай албан ёсны мэдэгдлийг Рио Тинтогийн Гүйцэтгэх захирал Сэм Уолш пүрэв гарагт хийжээ.

Тэрээр “Ерөнхий сайд Ч.Сайханбилэг Ашигт малтмалын тухай хуулинд өөрчлөлт оруулснаар Монгол Улс томоохон уул уурхайн төслүүддээ хөрөнгө оруулалтыг тогтворжуулна хэмээн найдсан. Гэвч Рио Тинто Оюутолгойн уурхайгаас илүү хувь худалдаж авах хүсэлгүй байна” хэмээн гэж хэлжээ.

Мөн “Би Монголын шинэ ерөнхий сайдтай уулзсан. Бид хуулийн өөрчлөлтийн тухай ярилцсан” гэж мэдэгдлээ.

Сэм Уолш хэлэхдээ “Нуух юмгүй манай компани уурхайн төсөлд анхаарч, доллар оруулахаа л хичээж байна. 34 хувь бол энэхүү төслийг тэнцвэржүүлэх бусдын өмч юм. Бид Оюутолгойн төслийн 51 хувийг эзэмшиж буйдаа сэтгэл хангалуун байгаа” хэмээн ярьжээ.

УИХ-ын зарим гишүүд ард түмний өмчийг мөнгөөр солих гэж байна, барууныхны гар хөл боллоо хэмээн шүүмжилж байсан бол С.Баярцогт тэргүүтэй гишүүд эдийн засгаа аврах зам үүнээс өөр байхгүй мэтээр хуулинд өөрчлөлт оруулахыг хамгаалж байсан юм. Тэднийг барууныхны гар хөл боллоо хэмээн ард түмэн шүүмжилж байна. Харин барууны томоохон компани Монголын төрийн эрх баригчдыг гар хөлөө болгох сонирхол байхгүй гэдгээ шууд утгаар дэлхий нийтэд зарлалаа. Энэ нь санал оруулагчид өөрсдөө л монголчуудын 34 хувийг зарах хүсэлтэй байна гэсэн үг биш гэж үү.