Хүн бүр хүүхдүүддээ чанартай, эрүүл, органик хүнс өгөхийг эрмэлздэг. Дэлгүүрийн лангуунд өрөөтэй байгаа ганган чамин хаяг шошготой бүтээгдэхүүнүүдээс бид юуг нь анхаарч авах ёстой вэ?

Эцэг эхчүүд маань ямар ч хүнс сонгоход мэдэж байх ёстой хэд хэдэн зүйлсийг заавал анзаарч байх хэрэгтэй гэж бодож байна. Ялангуяа, хадгалах хугацаа, орц найрлага, ямар нөхцөлд хадгалж байсан гээд олон зүйл үүнд нөлөөлдөг. Тиймээс хүүхдүүддээ чанартай, эрүүл хүнс сонгоход бидний зайлшгүй мэдэх ёстой зарим зүйлийг ээжүүдтэйгээ хуваалцъя.
 
1. Сав баглаа боодлын бүрэн бүтэн байдал:
Авах бүтээгдэхүүнийхээ бүрэн бүтэн байдлыг сайтар шалгаарай. Хэрэв сав баглаа боодол гэмтэж агаар орсон тохиолдолд бүтээгдэхүүний чанарт муугаар нөлөөлж болох юм. Жишээ нь сүүг ил задгай удаан хадгалвал гашилдагтай л адил юм.
2. Хадгалах хугацааг шалгах:
Мэдээж үйлдвэрлэсэн хугацаа болон дуусах хугацааг бид шалгадаг. Үүнээс гадна ямар нөхцөлд хадгалах нь дээрхээс дутахааргүй чухал. Мөн задалснаас хойш ямар хугацаанд яаж хадгалах мэдээллийг анхаарах нь чухал гэдгийг ээжүүд минь мартаж болохгүй.
3. Орц найрлага:
Байгалийн шинж чанараа хадгалсан хүнсийг сонгоход дараахь хоёр зүйлийг мэдсэн байх ёстой гэж боддог юм. Үүнд:
- ГМО буюу Генийн өөрчлөлттэй бүтээгдэхүүнээс зайлсхийх.

Генийн өөрчлөлттэй бүтээгдэхүүн (GMO - Genetically modified organism) гэдэг нь генийн инженерчлэлийн аргаар генийн бүтцийг нь өөрчилсөн организмуудын нэгдэл юм. Генийн өөрчлөлттэй хүнс нь хүний удамшлын тогтолцоонд нөлөөлж, нөхөж баршгүй хохирол учруулж болзошгүй юм. Тиймээс та аль болох Генийн өөрчлөлтгүй гэсэн тэмдэглэгээ /Оросоор Без ГМО, Англиар Non GMO/ байгаа эсхийг хараарай.
- Е орц буюу химийн нэмэлт орц

Хүнсний бүтээгдэхүүнүүдийн олонхид нь Е тэмдэглэгээтэй найрлага орсон байдаг. Энэ нь өнгө, амт оруулагч, үнэр оруулагч болон бусад хэлбэрээр тухайн хүнсийг өнгө үзэмжтэй, амттай болгох химийн найрлагууд юм. Тухайлбал,Е 100-Е199 будагч бодис нь хүнсний байгалийн өнгийг нь химийн будгаар хүчилж, хүмүүсийн анхаарлыг татах гэж өөрчилсөн үйлдвэрлэгчдийн заль юм. Гэтэл тартразин Е102 нь харшил үүсгэдэг бол Е127 нь бамбай булчирхайн өвчин үүсгэдэг хортой юм байна. Тиймээс тухайн бүтээгдэхүүний найрлаганд Е хэмээн тэмдэглэгдсэн бодис орсон эсэхийг дахин нэг нягтлах хэрэгтэй.
Энэ бүхний эцэст гэр бүлдээ эрүүл, чанартай хүнс хэрэглүүлж чадаж байгаа эсэхээ эрхэм бүсгүйчүүд минь дахин нэг эргэцүүлээд үзээрэй. Хүүхдүүдийн минь эрүүл ирээдүй бидний сонголтоос шалтгаална шүү.