Дуучин Робин Тике, Фаррелл Уильямс нарын “Blurred lines” дуу олон нийтэд цацагдсан даруйдаа хит болсон билээ. Тэгвэл энэ дууг хуучны дуучин Марвин Гэй-ийн 1977 онд гарсан “Got to Give It Up” дуунаас хулгайлсан хэргээр буруутгасан байна.
 
Марвин Гэй-ийн үр хүүхдүүд алдарт одуудыг зохиогчийн эрх зөрчсөн хэргээр буруутгаж Лос Анежелесийн шүүхэд гомдол гаргасан байна. Шүүхийн байгууллага хэргийг хэлэлцсэний үр дүнд дуучдыг буруутай хэмээн тогтоожээ. Мөн тэднийг зохиогчийн эрхийг зөрчсөн гэх үндэслэлээр 7.4 сая ам.долларыг нэхэмжлэл гаргагчид нөхөн төлөх шийтгэл ногдуулжээ.

2013 онд зохиогдсон “Blurred lines” дуу нь 12 долоо хоногийн турш дууны жагсаалтыг тэргүүлсэн юм. Уг дуу эзэддээ 16 сая ам.долларын ашиг өгснөөс 5.6-г нь Робин Тике, 5.2-ыг нь Фаррелл Уильямс авсан байна.

Дуучид шүүх хурлын шийдвэр сонсгох мөчид ирээгүй аж. Харин хэвлэлийн төлөөлөгчдөөрөө дамжуулж ийн мэдэгдсэн байна. “Бид шүүхийн шийдвэрийг хүндэтгэж байна. Гэвч өсч дэвжиж буй хөгжмийн ертөнцийг туших аймшигтай шийдвэр гаргасанд сэтгэл дундуур байна. Бид энэ дууг хулгайлаагүй. Зүрх сэтгэл, оюун ухаан, мэдрэмжээсээ гаргаж ирсэн. Магадгүй бид давж заалдаж мэдэх юм” хэмээн мэдэгджээ.