Ардчилагчдын эхлүүлсэн их хувьчлалын хоёр дахь шуурганд Хуримын ордон, усан спорт сургалтын төв /төв бассейн/ болон зарим эмнэлгүүд өртөөд байгаа. Иргэдийн эсэргүүцэлтэй тулгарсанаас болж эцсийн шийдвэрийг хараахан гаргаагүй ч ер нь хувьчлагдах магадлал өндөр байгааг эх сурвалжууд хэлж байна.

Бусдыг нь хувьчилж болдог юм гэхэд дээрх гурван байгууллагыг хувьчлахгүй орхихыг хүсэх хүмүүсийн тоо олон байна. Хамгийн гол нь тус байгууллагуудыг хувьчлахгүй байх хэд, хэдэн шалтгаан байгаа юм.

Тодруулбал, Хуримын ордныг хувьчилбал хосууд хаана очиж гэрлэлтээ баталгаажуулах вэ?. Уг нь гэр бүл бологсод бүл нэмсэнээ төрдөө бүртгүүлэх гэж хуримын ордонг зорьдог.

Тус ордонг хувьчилж авсан нөхөр нь “Эзэн нь юмаа мэдэж эрэг нь усаа” сахидаг гэж том дуугараад зориулалтыг нь өөрчилбөл гэрлэлт баталгаажуулах газаргүй болно гэсэн үг. Магадгүй тус барилгыг нураагаад оронд нь өндөр, том зочид буудал баривал яана. Эсвэл гадуур яригдаад байгаачлан “Шангрилла 2”-ын машины зогсоол ч барьж болох юм.

Хэрвээ ингэвэл хуримлагч хосууд ёслолын хувцсаа өмсөөд хотоор сэлгүүцнэ эсвэл сүмд очно. Тэгээд гэртээ найрлахаас өөр аргагүйд хүрнэ. Үр дагаварт нь хуримын ёс заншил болох шинээр гэр бүл болж байгаа хосууддаа хариуцлагыг нь мэдрүүлэх, монголд нэг гэр бүл нэмэгдлээ гэдгийг албан ёсоор баяр баясгалантайгаар мэдрүүлэх, хосуудад эцэг эх, эхнэр нөхөр байх үүрэг хариуцлагыг нь өндөржүүлж өгдөг байдал ор мөргүй алга болно гэсэн үг юм.

Нийслэлийн удирдлагууд Хуримын ордонг ашиггүй ажиллаж байгаа учраас хувьчлахаар болсон гэж буй. Тэгвэл тус ордны захирал С.Үүрийнтуяа арай өөр зүйлийг хэлж байгаа юм. Тэрбээр “Хуримын ордон өнгөрсөн жил 400 сая төгрөгийн ашигтай ажилласан. Манай орлого сүүлийн хэдэн жил өсч байгаа. Улсын болон нийслэлийн төсвөөс нэг ч төгрөгийн татаас авдаггүй. Орон нутгийн өмчит, аж ахуйн тооцоот үйлдвэрийн газар гэж явдаг. Бид өөрсдөө орлого олоод, олсон орлогоороо ажиллагсдаа цалинжуулаад, үл хөдлөхийнхөө татвар, газрын татвар, дулаан цахилгаанаа төлөөд тохижилт, засвараа хийгээд, бүх юмаа зохицуулаад явж чаддаг газар. Улсын төсөвт татвар, даатгалын хураамж, газрын төлбөр, ХАОАТ гээд бүх татвараа төлж, орлого оруулдаг. Цэвэр ашгийнхаа тодорхой хувийг нийслэлийн Өмчийн харилцааны газар өгч, нийслэлд орлого оруулдаг” гэжээ.

Хуримын ордон бол хосуудын төрийнхөө өмнө гэрлэлтээ баталгаажуулах газар. Хэрвээ үүнийг хувьчилбал Монголын төр залуу хосуудын насан туршийн сайхан дурсамжийг арчиж хаян тэднээс нүүр бууруулснаас өөрцгүй харагдана.

Хуримын ордноос гадна Хүүхэд залуусын төв бассейныг мөн хувьчилна гэж буй. Тус байгууллагыг хувьчилсаны дараа барилгыг нь нурааж 30 давхар зочид буудал барина гэх мэдээлэл байна. Хэрвээ зочид буудал барьвал усан спортоор хичээллэгч хүүхдүүд болон усанд сэлэх сонирхолтой хүмүүс хаана очих вэ гэдэг асуулт гарч ирж байна. Боломжтой нэг нь өндөр төлбөрөө төлөөд өөр бассейнд явна. Боломжгүй нь ус гэдгийг мартах л зам байна. 

Цаашлаад Хүүхдийн ордон, Урлан бүтээх төв зэргийг ч хувьчлах асуудлыг ярьж эхэлсэн байна. Энэ мэт хүүхдийн төлөө гэж дуугардаг хүмүүс эргээд тэднийхээ эсрэг үйл ажиллагаа явуулаад эхэллээ. 1996-2000 онд ардчилагчид их хувьчлалын нэгдүгээр аяныг явуулж нийт 20 гаруй аж, ахуй нэгжийг хувьчилсан. Харин одоо 40 гаруй аж, ахуй нэгжийг хувьчлах гэж байна. Хувьчлалыг учир, замбараатай явуулах ёстой. Бүх зүйлийг зоосны нүхээр хараад ашигтай л байвал хамаа алга гээд байвал хүүхэд, залуусын хөгжил гудамжинд хаягдаж, хохирч үлдэх гээд байна шүү дээ.