УИХ-ын чуулганы хуралдаанаар зарим байнгын хорооны гишүүдэд өөрчлөлт орууллаа. АН Засгийн газраас гарсан тул МАН болон АН-ын бүлгүүдийн санал нэгдсэнээр байнгын хорооноос АН-ын хуучин сайд нарыг мөн хасах хэрэгтэй болоод байсан юм. Тиймээс өнөөдөр Л.Болд, Л.Гансүх, С.Ламбаа, Х.Баттулга, С.Баярцогт зэрэг хуучин сайд нарыг харьяа байнгын хороодоос нь чөлөөлсөн шийдвэр гаргалаа.
   Мөн УИХ-ын гишүүн З.Энхболдыг Аюулгүй байдлын байнгын хорооны,  УИХ-ын гишүүн Ц.Дашдоржийг Нийгмийн бодлогын байнгын хорооны, УИХ-ын гишүүн Д.Одхүүг Төрийн байгуулалтын байнгын хорооны, УИХ-ын гишүүн Д.Хаянхярвааг Төсвийн байнгын хорооны, УИХ-ын гишүүн Ж.Энхбаярыг Хууль зүйн байнгын хорооны гишүүнээр тус тус томиллоо. Харин шинэ бүрэлдэхүүнтэй болж буй зарим байнгын хорооны дарга нарыг сонгох асуудал үдээс хойш хуралдах байнгын хороо тус бүр дээр яригдах юм байна.