Хаан банкнаас 30 сая төгрөг зээлсэн, “Эрдэнэ Суварга” компанийг үүсгэн байгуулагч Д.Бат-Эрдэнэ, түүний эхнэр, “Эрдэнэ Суварга” компанийн захирал Б.Сувдаа нарыг залилан мэхэлж, 15 сая 300 мянган төгрөгийн үнэ бүхий дөрвөн тээврийн хэрэгслийг бусдад зарж, үрэгдүүлсэн хэрэгт холбогдоод буй Д.Энхмандахын хэрэг шийдэгдэлгүй таван жилийн нүүрийг үзлээ. Харин тэрээр өөрийгөө гэм буруугүй, гэр бүлийн маргаанаас болж, намайг залилангийн хэрэгт гүтгэсэн хэмээн мэдүүлсээр байгаа билээ. Түүнд холбогдох анхан шатны шүүх хурал өнгөрсөн оны есдүгээр сарын 22-ны өдөр болж, мөрдөн байцаалтад буцсан юм. Гэвч хэрэгт хяналт тавьж буй Чингэлтэй дүүргийн хяналтын прокурор Б.Чимгээ эсэргүүцэл бичсэн. Харин үүнийг Д.Энхмандахын өмгөөлөгч О.Баасанхүү прокурорыг мэргэжлийн алдаа гаргаж, ажилдаа хариуцлагагүй хандсан хэмээн Улсын ерөнхий прокурорын мэргэжлийн Зөвлөлд гомдол гаргаад байсан юм. Түүний гомдлын хариуг өнөөдөр УЕПГ-ын мэргэжлийн зөвлөлөөс ирүүлсэн байна. Арга хэмжээ авхуулах тухай албан бичгийг Чингэлтэй дүүргийн Прокурорын газрын Хууль цаазын итгэмжит зөвлөх З.Энхтөрд хаяглан “Прокурор Б.Чимгээ яллах дүгнэлт үйлдүүлэхээр ирүүлсэн хэргийг яллагдагчтай хамт аваагүйгээс хуульд заасан хугацаанд шүүхэд шилжүүлэх хугацаа алдан, улмаар мөрдөн байцаагчид даалган, үлдээснийг Эрүүгийн байцаан шийтгэх хууль зөрчигдөхөд хүргэсэн. Хуульд заасан албан үүргээ хангалтгүй биелүүлж, хариуцлага алдсан зөрчил байх тул сахилгын дүрэмд заасны дагуу арга хэмжээ авахуулахаар холбогдох материалыг хүргүүллээ” гэжээ. Б.Чимэг
